देहूगाव: संपदा सोहळा नावडे मनाला। लागला टकळा पंढरीचा।।... या जगद्गुरू श्री संत तुकाराम महाराजांच्या अभंगातील वर्णनानुसार पंढरीची ओढ, विठ्ठलनामाची तळमळ आणि भक्तीचा आविष्कार मंगळवारच्या पालखी प्रस्थान सोहळ्यात अक्षरशः साकार झाल्याचे भावपूर्ण चित्र देहूनगरीत पाहायला मिळाले. जगद्गुरू श्री संत तुकाराम महाराज पालखी सोहळ्याचे मंगळवार (दि. ७) दुपारी ४ वाजता श्रीक्षेत्र देहूगाव येथील मुख्य मंदिरातून पंढरपूरकडे भक्तिमय वातावरणात प्रस्थान झाले.
या वेळी मंदिर परिसरात मानाच्या दिंड्यांचे वारकरी मोठ्या संख्येने उपस्थित होते. टाळ-मृदंगाच्या गजरात, हरिनामाच्या जयघोषात वारकरी भक्तांनी फुगड्या, खेळ आणि भक्तिरंगात रंगून एकमेकांच्या चरणी नतमस्तक होत गळाभेट घेतली. परस्परांची खुशाली विचारत, 'ज्ञानोबा-तुकाराम'च्या जयघोषात देहूनगरी न्हाऊन गेली. या वेळी वरुणराजानेही जणू या भक्तिसोहळ्याला साक्षी राहण्यासाठी हजेरी लावली. पावसाच्या सरी अंगावर घेत वारकरी ओलेचिंब होऊन देहभान विसरून नाचत, बागडत विठ्ठलनामात तल्लीन झाले होते. प्रत्येक थेंब हा जणू विठ्ठलाची कृपावृष्टीच असल्याचा अनुभव भाविक घेत होते.
नामघोषात वारकरी दंग
मंदिर प्रदक्षिणेनंतर पालखी सोहळा मुख्य मंदिरातून बाहेर पडताच “पुंडलिक वरदा हरी विठ्ठल श्री ज्ञानदेव तुकाराम”च्या नामघोषांनी परिसर दुमदुमून गेला. अभंगगायन सुरू असतानाच वरुणराजाने पुन्हा कृपावृष्टी करत या सोहळ्याचे स्वागत केल्याचे भाविकांनी अनुभवलं. टाळकरी, वारकरी ओलेचिंब अवस्थेतही देहभान हरपून नाचत, आनंदोत्सव साजरा करत होते. अभंग आरतीनंतर अब्दागिरी, भागवत धर्माच्या पताका तसेच बाभूळकर व मोहिते पाटील यांच्या मानाच्या अश्वांसह हा पालखी सोहळा भक्तिरसात न्हाऊन निघत पुढे मार्गस्थ झाला.
इनामदार वाड्यात मुक्काम
अखेर या दिव्य आणि अलौकिक वातावरणात पालखी सोहळ्याने इनामदारसाहेब वाडा येथे पहिल्या मुक्कामासाठी विसावा घेतला.
वैष्णवांचा आनंदोत्सव
जगद्गुरू श्री संत तुकाराम महाराजांच्या पालखी प्रस्थान सोहळ्यानिमित्त देहूनगरीत हजारो वारकरी, वैष्णव भाविकभक्त दाखल झाले होते. वरुण राजाने सकाळपासूनच हलक्या सरींचा वर्षाव करून जगद्गुरू श्री संत तुकाराम महाराज पालखी प्रस्थान सोहळ्याचे स्वागत केले. भर पावसात वारकरी भाविकभक्त टाळ, मृदंगाचा गजर आणि पुंडलिक वरदा हरी विठ्ठल, ज्ञानोबा, तुकोबांच्या नामघोषाने अवघी देहूनगरी दुमदुमली आहे.
अनेक वारकरी भाविकभक्तांनी फुगड्या खेळून, येरे बा विठ्ठला, तू येरे बा विठ्ठला असो नामघोष करून फुगड्या खेळून एकमेकांच्या चरणी नतमस्तक झाले. एकूणच त्यांच्यामध्ये परमानंद जाणवत होता. पोलिस कर्मचाऱ्यांनादेखील या सोहळ्यात 'ज्ञानोबा तुकाराम'च्या नामघोषावर फुगडी घालण्याचा मोह आवरता आला नाही. आपल्या डोईवर तुळशी वृंदावन, विठ्ठल रखुमाईची मूर्ती, संबळचा निनाद, विठ्ठल, विठ्ठल हरिनामाचा गजर अशा प्रसन्न वातावरणात हा फुगड्यांचा खेळ रंगला होता. संत तुकाराम महाराज मुख्य गाभारा, भजनी मंडप, राम मंदिर, शिळा मंदिर, महाद्वार यांना विविध रंगीबेरंगी फुलापानांची आकर्षक सजावट करण्यात आली होती.
