खराळवाडी: पुणे-मुंबई महामार्गावरून पिंपरी साई चौकाकडे जाणाऱ्या रस्त्यावर झाडाची मोठी फांदी लोंबकळत असल्याने वाहनचालकांना अडचणींचा सामना करावा लागत आहे. ही फांदी वाहनांच्या मार्गात येत असल्याने वाहतुकीला अडथळा निर्माण होत असून, दुचाकीस्वार तसेच मोठ्या वाहनांना अपघाताचा धोका निर्माण झाला आहे.
प्रशासनाचे दुर्लक्ष
या मार्गावर दिवसभर वाहनांची मोठी वर्दळ असते. त्यातच रस्त्याच्या दिशेने लोंबकळणारी फांदी वाहनचालकांच्या लक्षात न आल्यास वाहनाला धडकण्याची अथवा दुचाकीस्वाराचा तोल जाण्याची शक्यता आहे. रात्रीच्यावेळी प्रकाश कमी असल्याने या या रस्त्यावर अपघात होण्याची शक्यता नाकारता येत नाही. पिंपरी शहरातील रस्त्यांवर झाडांच्या धोकादायक फांद्यांमुळे वाहनचालकांना धोका निर्माण होण्याच्या घटना यापूर्वीही निदर्शनास आल्या आहेत.
महामार्गालगतच्या या रस्त्यावर वाहतुकीचा वाढता ताण लक्षात घेता संबंधित विभागाने तातडीने पाहणी करून रस्त्यावर आलेली फांदी छाटावी, अशी मागणी वाहनचालक व नागरिकांकडून होत आहे. महापालिकेच्या उद्यान विभागाने याची तातडीने दखल घ्यावी, अशी मागणी नागरिकांकडून केली जात आहे.
फांद्या हटविण्याची मागणी
रस्त्यावर आडवी आलेली फांदी तातडीने छाटून वाहतुकीचा मार्ग मोकळा करावा आणि संभाव्य अपघात टाळण्यासाठी संबंधित विभागाने विलंब न करता कारवाई करण्याची मागणी वाहनचालकांकडून केली जात आहे.
