पिंपरी: रावेत येथे कोणतीही परवानगी न घेता करण्यात आलेल्या ब्लास्टिंगमुळे एका मजुराच्या पायाला गंभीर दुखापत झाली. याप्रकरणी दोन कंत्राटदारांविरोधात गुन्हा दाखल करण्यात आला आहे. ही घटना मंगळवारी (दि. 26) सकाळी सव्वाअकराच्या सुमारास मुकाई चौक ते भक्ती-शक्ती चौक नवीन बीआरटी रोडवरील 108 आस्टोरिया साईट येथे घडली.
बबलू शेख (वय 35) असे जखमी मजुराचे नाव आहे. पोलिस शिपाई दशरथ सदगीर यांनी रावेत पोलिस ठाण्यात फिर्याद दिली आहे. त्यानुसार, शशिकांत राघवशरण श्रीवास्तव (55, रा. ताथवडे) आणि सचिन शंकर चव्हाण (23, रा. कुरुळी, खेड) यांच्याविरोधात गुन्हा दाखल करून नोटीस बजावण्यात आली आहे.
आरोपींनी ब्लास्टिंगसाठी कोणतीही अधिकृत परवानगी घेतली नव्हती. तसेच, सर्व जिलेटिन कांड्यांचा स्फोट झाला की नाही याची खातरजमा न करता मजूर बबलू शेख याला पुन्हा त्याच ठिकाणी ड्रील मशीनने होल घेण्यास सांगितले. त्या वेळी अचानक स्फोट होऊन बबलू शेख याच्या पायाला गंभीर दुखापत झाली.
