तुषार झरेकर
पिंपरी-चिंचवड: शहरातील मोहननगर परिसरात मंगळवारी दुपारी एमएनजीएल कंपनीची पीएनजी गॅस पाईपलाईन फुटल्याची घटना घडली. अचानक झालेल्या या प्रकारामुळे स्फोटासारखा मोठा आवाज झाला आणि परिसरात काहीकाळ भीतीचे वातावरण निर्माण झाले. जीव वाचवण्यासाठी नागरिकांनी धावाधाव करत सुरक्षित ठिकाणी आसरा घेतला.
दुपारी सुमारे एकच्या सुमारास ही घटना घडली असून संपूर्ण प्रकार सीसीटीव्हीत कैद झाला आहे. पाईपलाईन फुटल्यानंतर मोठ्या प्रमाणात दगड-माती हवेत उडाली. याचवेळी रस्त्यावरून दुचाकीवरून जात असलेल्या एका व्यक्तीच्या अंगावर दगड लागल्याने तो जखमी झाला. सुदैवाने जखम किरकोळ असल्याची माहिती स्थानिकांनी दिली.
ही पाईपलाईन एमएनजीएलची असून त्यातून पीएनजी गॅस पुरवठा केला जातो, असे नागरिकांचे म्हणणे आहे. पाईपलाईन टाकण्याच्या कामात हलगर्जीपणा झाल्याचा आरोपही स्थानिकांकडून करण्यात येत आहे.
या घटनेमुळे परिसरातील सुरक्षेचा प्रश्न पुन्हा ऐरणीवर आला आहे. अशा प्रकारच्या दुर्घटनांना जबाबदार कोण, असा सवाल नागरिक उपस्थित करत आहेत. संबंधित यंत्रणांनी या प्रकरणाची तातडीने चौकशी करून दोषींवर कारवाई करावी, अशी मागणी होत आहे.
दरम्यान, प्रत्यक्षदर्शी नागरिकांनी घटनेचे भयावह स्वरूप सांगत मोठा आवाज झाल्यानंतर काही क्षण काय घडले हेच समजले नाही, असे प्रत्यक्षदर्शी यांनी सांगितले. स्थानिक नागरिक मारुती भापकर, गणेश लंगोटे यांनीही या घटनेविषयी तीव्र चिंता व्यक्त केली आहे.
