पिंपरी: महाराष्ट्र नॅचरल गॅस लिमिटेड (एमएनजीएल) कंपनीच्या वतीने शहरातील सर्व हाऊसिंग सोसायट्यांना घरगुती गॅस पाइपलाइनची जोडणी केली जाणार आहे. त्यासाठी पिंपरी-चिंचवड महापालिकेच्या आयटीआयमधून प्रशिक्षित झालेल्या प्लंबर उपलब्ध करून देण्यात येणार आहेत. निवड झालेल्या प्लंबरला महिन्यास 70 हजारांपेक्षा अधिक उत्पन्न मिळणार आहे.
प्लंबरसाठी महापालिकेच्या मोरवाडी आयटीआयमध्ये भरती मेळावा घेण्यात आला. त्यात एमएनजीएलचे वरिष्ठ व्यवस्थापक वासुदेव गुरसाळी यांनी कामकाजाबाबत सविस्तर माहिती दिली. इच्छुक प्लंबर्सना दोन दिवसांचे प्रशिक्षण दिले जाणार आहे.
त्यांना साईटवर प्रत्यक्ष काम शिकवले जाणार आहे. भविष्यात सीजीडी कंपन्यांमध्ये प्लंबर्सची मागणी झपाट्याने वाढणार आहे. त्यामुळे या क्षेत्रात मोठ्या प्रमाणात संधी उपलब्ध होणार आहेत. निवडलेले प्लंबर्स हे एमएनजीएलचे अधिकृत व्हेंडर्सअंतर्गत काम करतील.
त्यांच्या कामाच्या कार्यक्षेत्रामध्ये एमसीव्हीटू इंस्टॉलेशन, मीटर इंस्टॉलेशन, कॉपर पाईपिंग आणि किचन कन्वर्जनचे काम समाविष्ट आहे. जॉब वर्कनुसार महिन्याला साधारण 70 हजारांपेक्षा जास्त रुपयांची कमाई होईल. एमएनजीएलचे उपप्रबंधक ओम उगले व अमोल वैद्य यांनीही मार्गदर्शन केले.
मेळाव्यात 40 ते 50 प्लंबर विद्यार्थ्यांनी त्या कामास तयारी दर्शवली. ती संख्या अजून वाढणार आहे. अजून प्लंबर्स इच्छुक असतील तर त्यांनी आयटीआयला संपर्क साधावा, असे आवाहन प्राचार्य शशिकांत पाटील यांनी केले आहे. या वेळी गटनिदेशक शर्मिला काराबळे, रवी ओव्हाळ, निदेशक किसन गावडे, विक्रम काळोखे, विशाल रेंगडे आदी उपस्थित होते.
