पिंपरी: वाहतुकीचे नियम मोडणाऱ्या वाहनचालकांविरोधात पिंपरी-चिंचवड वाहतूक पोलिसांनी विशेष मोहीम राबवत अवघ्या १५ दिवसांत १९ हजार वाहनांवर कारवाई केली आहे. या कारवाईत एक कोटी ८५ लाख १३ हजार ३०० रुपयांचा दंड आकारण्यात आला आहे.
पिंपरी-चिंचवड आयुक्तालयाच्या हद्दीत चाकण, भोसरी, तळेगाव ही औद्योगिक क्षेत्रे, तर हिंजवडी, तळवडे, चिखली ही आयटी हब आहेत. तसेच, देहू आणि आळंदी ही प्रमुख तीर्थक्षेत्रे असून, शहरातून पुणे-मुंबई द्रुतगती मार्ग, पुणे-मुंबई महामार्ग, पुणे-नाशिक महामार्ग आणि मुंबई-बंगळुरू महामार्ग जातात. त्यामुळे वाहनांची संख्या मोठ्या प्रमाणात वाढली आहे.
दरम्यान, जून महिन्याच्या पहिल्या दोन आठवड्यांत काळ्या काचा लावलेल्या २ हजार ५६२ वाहनांवर कारवाई करण्यात आली आहे. बदल केलेले सायलेन्सर वापरणाऱ्या १ हजार १८ वाहनचालकांवर दंडात्मक कारवाई करण्यात आली.
जड-अवजड वाहनांच्या ४ हजार ४४४ चालकांवर कारवाई करण्यात आली आहे. नो पार्किंग झोनमध्ये वाहने उभी करणाऱ्या १० हजार ६०७ वाहनांवर दंड ठोठावण्यात आला. तसेच, मद्यप्राशन करून वाहन चालविणाऱ्या ४०४ वाहनचालकांवर कारवाई करण्यात आली.या सर्व कारवायांमधून एकूण एक कोटी ८५ लाख १३ हजार ३०० रुपयांचा दंड वसूल करण्यात आला आहे.
