पिंपरी: पिंपरी-चिंचवड शहरात स्वाइन फ्लू (एच१ एन१) चा प्रादुर्भाव वाढत असून, आता पुन्हा महिनाखेरीस आणखी ४ नवे रुग्ण आढळून आले आहेत. यामुळे रुग्णसंख्या 23 वर पोहोचली आहे, अशी माहिती महापालिकेच्या वैद्यकीय विभागाने दिली आहे.
गेल्या आठवड्यामध्ये २५ ऑगस्ट रोजी स्वाईन फ्लूचे १९ रुग्ण आढळल्याची माहिती वैद्यकीय विभागाने दिली होती. त्यानंतर आता पुन्हा महिनाअखेरीस ४ रुग्ण आढळले आहेत. तसेच जुलै महिन्यातदेखील स्वाईन फ्लूचे ५ रुग्ण आढळले होते.
दरम्यान, हवामानातील बदल आणि सततच्या पावसामुळे एच१ एन१ विषाणूचा संसर्ग वाढत असल्याचे डॉक्टरांचे मत आहे. ताप, खोकला, घसादुखी अशी लक्षणे आढळल्यास तात्काळ जवळच्या महापालिका दवाखान्यात तपासणी करावी, ताप, सर्दी, खोकला, घसादुखी किंवा श्वसनाशी संबंधित लक्षणे आढळल्यास त्याकडे दुर्लक्ष न करता तातडीने वैद्यकीय सल्ला घ्यावा, असे आवाहन पिंपरी चिंचवड महापालिकेच्या वैद्यकीय विभागाच्या वतीने करण्यात आले आहे.
स्वाईन फ्लू हा श्वसनसंस्थेशी संबंधित आजार असून सर्दी, खोकला, घसादुखी, ताप तसेच श्वसनाशी संबंधित विविध लक्षणे आढळू शकतात. वातावरणातील बदलाच्या पार्श्वभूमीवर नागरिकांनी आपल्या आरोग्याकडे विशेष लक्ष देणे आवश्यक आहे.
