पिंपरी: पिंपरी-चिंचवड शहरातील सुमारे 7 लाख 32 हजार 302 मिळकतींची नोंद महापालिकेकडे आहे. त्यापैकी 5 लाख 26 हजार 226 मालमत्ताधारकांनी आतापर्यंत मालमत्ताकराचे बिल भरले आहे. अद्याप 2 लाख 6 हजार 76 मालमत्ताधारकांनी मालमत्ताकराचा भरणा केलेला नाही. चालू वर्षाचा मालमत्ताकर थकबाकीसह तातडीने भरावा, असे आवाहन महापालिकेच्या कर संकलन विभागाचे उपायुक्त सचिन पवार यांनी केले आहे.
करसंकलन विभागामार्फत पहिल्या व दुसऱ्या तिमाहीत मालमत्ताकर भरणाऱ्या नागरिकांना वेगवेगळ्या प्रकारच्या सवलती देण्यात आल्या होत्या. या सवलतींचा लाभ घेत अनेक नागरिकांनी वेळेत कर भरला असून, यामुळे कर संकलनात लक्षणीय वाढ झाली आहे.
महापालिकेने उपलब्ध करून दिलेल्या ऑनलाईन, रोख, धनादेश तसेच, ई-डीसीएस या विविध सुलभ माध्यमांचा लाभ घेत मालमत्ताधारक मोठ्या प्रमाणात बिल भरणा करत आहेत. विशेषतः ऑनलाईन कर भरण्यास नागरिकांचा मोठा प्रतिसाद मिळत आहे. आत्तापर्यंत तब्बल 715 कोटी रुपयांचा भरणा महापालिका तिजोरीत झाला आहे. अद्याप ज्या मालमत्ताधारकांनी मालमत्ताकर भरलेला नाही, त्यांनी तो भरून विलंब दंड तसेच, कारवाई टाळावी, असे आवाहन करण्यात आले आहे.
कर भरून जप्ती कारवाई टाळावी
ज्या मालमत्ताधारकांनी अद्याप मालमत्ताकराचा भरणा केलेला नाही, त्यांनी तातडीने बिल भरावे. महापालिकेने कर भरण्यासाठी सुलभ आणि विविध माध्यमे उपलब्ध करून दिली आहेत. वेळेत कर भरल्यास विलंब दंड तसेच, जप्ती अथवा इतर कारवाई टाळता येईल. नागरिकांच्या सोयीसाठी शहरातील 18 विभागीय कर संकलन कार्यालये शनिवार व रविवार आणि सुटीच्या दिवशीही सुरू ठेवण्यात आली आहेत, असे महापौर रवी लांडगे यांनी सांगितले.
ऑनलाइन कर भरण्यास नागरिकांचा वाढता प्रतिसाद
ऑनलाइन बिल भरणारे -4 लाख 30 हजार 279
रोखीने बिल भरणारे - 56 हजार 450
धनादेशाद्वारे बिल भरणारे -12 हजार 511
बीबीपीएसद्वारे बिल भरणारे - 26 हजार 881
ई-डीसीएसने बिल भरणारे - 105
