पिंपरी: पिंपरी-चिंचवड शहर परिसरात सोमवार (दि. २२) पावसाच्या हलक्या सरी बरसल्या; मात्र ऊन पावसाचा खेळ सुरू असल्यामुळे वातावरणात गारवा निर्माण होण्याऐवजी उकाडा वाढला.
सोमवार सकाळपासून ढगाळ वातावरण होते. दुपारी १२ ते १ च्या दरम्यान शहरात पावसाच्या हलक्या सरी कोसळल्या. जोरदार पाऊस पडेल, अशी आशा असतानाच पावसाने हुलकावणी दिली. त्यानंतर दिवसभर कडक ऊन आणि उकाडा यांनी नागरिकांची निराशा झाली.
जून महिन्याच्या शेवटच्या टप्प्यात आल्यानंतरही पाऊस नाही. शहरावर पाणी कपातीची टांगती तलवार आहे. तसेच यंदा उन्हाळाही खूपच कडक राहिल्याने नागरिकांना आता पावसाची आशा लागली आहे. दररोज ३८ ते ४० अंश कमाल तापमान आणि रात्रीही उष्ण त्यामुळे नागरिक पुरते हैराण झाले आहेत. सध्या तापमान ३५ अंश इतके असले तरी उकाडा आहे. २३ जूननंतर पाऊस सक्रिय होण्याची शक्यता हवामान विभागाने वर्तविली आहे. त्यामुळे पावसाकडे नागरिकांचे लक्ष लागले आहे.
