पिंपरी: पिंपरी-चिंचवड शहर परिसरात बुधवार (दि. १) पहाटेपासून रिमझिम पावसाने हजेरी लावली; मात्र दुपारी दोननंतर पावसाच्या सरी कोसळण्यास सुरुवात झाली. पहाटेपासून सुरू असलेल्या पावसामुळे वातावरणात थंडावा निर्माण झाला आहे. शहराच्या कमाल तापमानात घट झाली असून, दररोज ३३ ते ३५ अंशादरम्यान असणारे तापमान २८ अंश इतके नोंदविले गेले. शहरात दिवसभरात ११. ५ मिलिमीटर पावसाची नोंद झाली.
बुधवारी पहाटेच्या दरम्यान सुरू झालेल्या रिमझिम सरींनी सकाळी काही काळ विश्रांती घेतली. त्यानंतर दुपारी दोनपासून पावसाच्या सरी कोसळण्यास सुरुवात झाली. पावसामुळे शहरातील सखल भागांत पाणी साचले होते. निगडी, आकुर्डी, चिंचवड, वाल्हेकरवाडी, पिंपरी, चिखली, मोशी, भोसरी, चऱ्होली याठिकाणी पाणी साचल्यामुळे पादाचाऱ्यांची तारांबळ उडाली. पाऊस सुरू झाला तसे रस्त्यावरील खड्ड्यांनीदेखील डोके वर काढले आहे.
सुरुवातीला रिमझिम आणि नंतर जोरदार पावसामुळे घराबाहेर पडलेल्या नागरिकांना आडोसा शोधावा लागला. दरम्यान, बुधवारी सकाळपासूनच शहरात ढगाळ वातावरण होते. उकडाही जाणवत होता. दुपारी दोन वाजण्याच्या सुमारास पावसाला सुरुवात झाली. रस्त्यावरील पथारी, हातगाडीवाले यांच्या व्यवसायावर परिणाम झाला. पावसामुळे बाजार, भाजी मंडईमधील वर्दळ काहीशी रोडावली असल्याचे दिसून आले. सायंकाळी पाचनंतर पावसाने थोडी विश्रांती घेतल्यामुळे रस्त्यावरील पाणी ओसरले.
