पिंपरी: पिंपरी-चिंचवड महापालिकेच्या शाळा, कार्यालये, दवाखाने या ठिकाणी असलेल्या पिण्याच्या पाण्याच्या टाक्यांची शास्त्रोक्त पध्दतीने साफसफाई व स्वच्छता करण्यात येणार आहे. त्यासाठी राजलक्ष्मी स्वयंरोजगार सेवा सहकारी या संस्थेला काम देण्यात आले आहे. या कामासाठी तीन वर्षांसाठी 2 कोटी 24 लाख 33 हजार रुपयांचा खर्च होणार आहे. त्याला स्थायी समितीकडून मान्यता देण्यात आली.
शहरामध्ये महापालिकेच्या प्राथमिक 105 व माध्यमिकच्या 18 शाळा आहेत. रुग्णालय, दवाखाने व क्षेत्रीय कार्यालये आहेत. या ठिकाणी पिण्याच्या पाण्याच्या टाक्या आहेत. या टाक्याची स्वच्छता करण्यासाठी प्रशासनाने निविदाप्रक्रिया राबवली होती. त्यामध्ये 3 ठेकेदारांनी सहभाग घेतला. त्यापैकी एक ठेकेदार अपात्र झाल्याने दोन ठेकेदार या कामासाठी पात्र झाले.
त्यामध्ये राजलक्ष्मी स्वयंरोजगार संस्थेने 2 कोटी 36 लाख 13 हजार 785 निविदा रकमेवर 5 टक्के कमी 2 कोटी 24 लाख 33 हजार 96 रुपये इतका दर सादर केला. हा दर दुसऱ्या ठेकेदारापेक्षा कमी असल्याने संबंधित ठेकेदाराची नियुक्ती करण्यास स्थायी समितीने मान्यता दिली. टाक्याची स्वच्छता व्यवस्थित न झाल्यास किंवा दूषित पाणीपुरवठा झाल्यास संबंधित विभागावर कारवाई केली जावी, अशी सूचना समिती सदस्याकडून करण्यात आली.
