पिंपरी: पिंपरी-चिंचवड महापालिकेच्या अधिकृत बोधचिन्हात स्थायी समितीने छोटे बदल करण्यात आले आहेत. त्यानुसार, या बोधचिन्हामध्ये आता छत्रपती शिवाजी महाराजांच्या अश्वारूढ प्रतिमेचे तसेच ‘कटिबद्धा जनहिताय’ हे प्रेरणादायी ब्रीदवाक्य अधिक स्पष्टपणे व ठळक दिसत आहे. हे बोधचिन्ह कांस्यधातूमध्ये बनवल्याचा भास होत आहे. बोधचिन्हातील बदलास स्थायी समितने उपसूचनेद्वारे मंजुरी दिली आहे.
महापालिकेचे सध्याचे बोधचिन्ह हे स्केच काढल्याप्रमाणे आहे. त्या बोधचिन्हात बदल करून त्यामध्ये छत्रपती शिवाजी महाराजांची अश्वारूढ प्रतिमा अधिक ठळकपणे जाणवत आहे; तसेच महापालिकेच्या वतीने जनहिताची कामे करताना हे बोधचिन्ह व त्यावरील ‘कटिबद्धा जनहिताय’ हा संदेश प्रशासकीय व सामाजिक बांधिलकीची साक्ष देणार आहे.
बोधचिन्ह कांस्यधातून तयार झाल्याचा आभास निर्माण करत आहे. हे नवीन बोधचिन्ह महापालिका भवन, सर्व दहा क्षेत्रीय कार्यालय तसेच, विविध विभागांच्या इमारतींच्या दर्शनी ठिकाणी लावण्यात येणार आहे. नव्या रचनेतील बोधचिन्हास स्थायी समितीने उपसूचनेद्वारे मंजुरी दिली आहे. दरम्यान, समितीच्या उपसूचनेनुसार नव्या बोधचिन्हास आयुक्तांनी अंतिम मान्यता दिल्यानंतर पुढील कार्यवाही केली जाणार आहे.
