पिंपरी: वर्षभर टिकणारे कैरीचे लोणचे बनवण्यासाठी गृहिणींची लगबग सुरू झाली आहे. शेतकऱ्यांनी कैरी विक्रीसाठी आणल्याने सध्या बाजारात कैरीची आवक वाढली असली तरी कैरी मात्र, यंदा महागली आहे. कैरी 60 ते 80 रुपये किलोने उपलब्ध आहे. तसेच, ते फोडण्यासाठी 15 ते 20 रुपये मोजावे लागत आहेत.
उडीद, पापड, कुरडया, शेवया, खारोड्या अशा वाळवणाचे पदार्थ बनवण्यासाठी गृहिणींची लगबग सुरू आहे. तसेच, आता जेवणाची चव वाढवणारा व ताटात हमखास दिसणारा एक पदार्थ म्हणजे कैरीचे लोणचे. मे महिन्याच्या शेवटच्या टप्प्यात पावसाची शक्यता असते. त्यामुळे लोणचे करण्याची महिलांची लगबग दिसत आहे. या दिवसात लोणाच्याच्या कैऱ्यादेखील पूर्ण तयार झालेल्या असतात.
मसाल्यांचे दर तेजीत
लोणचे जेवण रुचकर बनवते, परंतु आता लोणच्याच्या कैऱ्या भाव खाताना दिसताहेत. दरवर्षीप्रमाणे घरोघरी लोणचे बनवण्याची तयारी सुरू झाली आहे. मागणीमुळे कैरीचे भावही वाढले आहेत. तसेच, मसाल्यांचे दर तेजीत आहेत. लोणच्यासाठी लागणारे शेंगदाणा तेल, गरम मसाले, मोहरी, हिंग, लवंग, हळद, बडीशेप, धणे, दालचिनी, वेलची, मोहरी डाळीचे भाव वधारले असले तरी घरगुती लोणचे तयार करताना महिला दिसत आहेत.
त्यामुळे ग्रामीण तसेच शहरी भागात लोणच्यासाठी लागणारा मसाला घेण्यासाठी बाजारात गर्दी होत आहे. तोंडाला चव नसेल तर लोणच्याचा आधार असतो. एक कैरीची फोड जेवणाची लज्जत वाढवित असते. लिंबापेक्षाही जास्त कैरीच्या लोणच्याला मागणी असते.
