पिंपरी: पिंपरी-चिंचवड शहरातील 88 इमारती व घरे धोकादायक असल्याचे निदर्शनास आल्यानंतर महापालिकेने पावसाळ्यापूर्वी मालकांना नोटिसा बजाविल्या. त्यापैकी 13 घर मालकांनी स्वतःहून इमारतीची दुरुस्ती करून घेतली आहे. एक अतिधोकादायक इमारत महापालिकेने पाडली आहे. तर, 74 जणांनी महापालिकेच्या नोटिसीकडे दुर्लक्ष केले आहे.
पावसाळ्यात धोकादायक इमारती कोसळून अपघाताची शक्यता असते. त्यामुळे महापालिकेकडून जुन्या इमारती, वाडे, घरे यांचे सर्वेक्षण करून धोकादायक इमारती निश्चित केल्या जातात. यंदा शहरात एकूण 88 धोकादायक इमारती आढळून आल्या आहेत. (Latest Pimpri News)
त्यापैकी सहा अतिधोकादायक आहेत. ड क्षेत्रीय कार्यालयाच्या हद्दीत सर्वाधिक 37 धोकादायक इमारती आहेत. महापालिकेने 88 इमारत मालकांना नोटिसा दिल्या होत्या, ज्यामध्ये त्यांनी धोकादायक बांधकामे हटवावी किंवा तातडीने दुरुस्ती करावी, असे आवाहन केले होते.
मात्र, या नोटीसांकडे संबंधित इमारती मालकांनी दुर्लक्ष केले आहे. यामध्ये दोन अतिधोकादायक इमारती आहेत. आठ इमारतींतील रहिवाशांना तातडीने इमारत रिकामी करून दुरुस्ती करणे आवश्यक आहे. तर, 14 इमारती रिकाम्या न करता दुरुस्ती करण्याच्या प्रक्रियेत आहेत. उर्वरित 50 इमारतींच्या मालकांना किरकोळ दुरुस्ती करण्याचे आवाहन महापालिकेने केले आहे.
दुर्घटना घडल्यास मालक जबाबदार
महापालिकेने धोकादायक इमारतींच्या मालकांना नोटिसा दिल्या आहेत. त्यापैकी 13 मालकांनी इमारतीची दुरुस्ती करून घेतली आहे. अतिधोकादायक असलेली एक इमारत महापालिकेकडून पाडण्यात आली आहे. उर्वरित नोटिस बजावलेल्या घर मालकांनी नागरिकांच्या सुरक्षिततेसाठी त्वरित दुरुस्ती करावी, अन्यथा काही अपघात घडल्यास मालक जबाबदार राहतील, असा इशारा महापालिका प्रशासनाने दिला आहे.
