Kerala Driver Sleeping In Car Viral Video: केरळमधील कोट्टयम येथे एक अजब घटना घडली असून त्याचा व्हिडिओ सध्या सोशल मीडियावर व्हायरल होत आहे. एका कारचालकाने भररस्त्यात कार थांबवली आणि कारमध्येच गाढ झोपून गेला. रस्त्यावर वाहतूक कोंडी झाली, लोकांनी हॉर्न वाजवले, चालकाला आवाज दिला, इतकेच नव्हे तर कार हलवूनही त्याला जागे करण्याचा प्रयत्न केला; मात्र तो बराच वेळ गाढ झोपेतच होता.
व्हायरल व्हिडिओनुसार, ही घटना कोट्टयम जिल्ह्यातील अथिरांपुझा पल्ली जंक्शन परिसरात घडली. अथिरांपुझा-एट्टुमानूर रस्त्यावर एका चालकाने आपली लाल रंगाची कार रस्त्याच्या मधोमध थांबवली.
रस्त्याच्या मधोमध कार उभी राहिल्याने वाहतूक कोंडी झाली. सुरुवातीला इतर वाहनचालकांनी हॉर्न वाजवून चालकाला कार बाजूला घेण्याचे संकेत दिले. मात्र, कारमधून कोणतीही हालचाल झाली नाही.
वाहतूक वाढू लागल्यानंतर काही लोक कारजवळ जमा झाले. त्यांनी कारमधील चालकाला हाका मारल्या. मात्र, तो कोणताही प्रतिसाद देत नव्हता. त्यानंतर काही नागरिकांनी चालकाला जागे करण्यासाठी कार हलवून पाहिली.
मात्र, एवढे करूनही चालक बराच वेळ जागा झाला नाही. तो इतका गाढ झोपला होता की कार हलवल्यानंतरही त्याला जाग आली नाही. त्याच्या एका कानात इयरफोनही असल्याचे सांगण्यात येत आहे.
हा प्रकार पाहून सुरुवातीला नागरिकांमध्ये चिंता निर्माण झाली. चालकाला अचानक काही वैद्यकीय त्रास झाला असावा, तो बेशुद्ध झाला असावा किंवा रक्तदाबाशी संबंधित समस्या निर्माण झाली असावी, अशी शंका काहींना आली. त्यामुळे अखेर पोलिसांना या घटनेची माहिती देण्यात आली.
पोलिस घटनास्थळी पोहोचल्यानंतर कार उघडण्यात आली आणि चालकाला झोपेतून जागे करण्यात आले. त्यानंतर कारमध्ये मद्याच्या बाटल्या आणि सोडा आढळल्याचे समोर आले. यानंतर या संपूर्ण प्रकारामागचे कारण स्पष्ट झाल्याची चर्चा सुरू झाली.
स्थानिक वृत्तांनुसार, या चालकाचे नाव जोबिन जॉनी असून तो कोट्टयम जिल्ह्यातील कंगाझा येथील रहिवासी आहे. पोलिसांनी चालकासह कारही ताब्यात घेतली आहे. त्याच्याविरोधात मद्यप्राशन करून वाहन चालवणे आणि वाहतुकीत अडथळा निर्माण केल्याप्रकरणी गुन्हा दाखल करण्यात आल्याचे सांगण्यात आले आहे. या प्रकरणात पुढील कायदेशीर कारवाई सुरू आहे.
या संपूर्ण घटनेदरम्यान काही नागरिकांनी व्हिडिओ शूट केला. हा व्हिडिओ सोशल मीडियावर अपलोड होताच तो मोठ्या प्रमाणात व्हायरल झाला. व्हिडिओ पाहून नेटकऱ्यांकडून वेगवेगळ्या प्रतिक्रिया येत आहेत.
काहींनी चालकावर टीका केली आहे. मद्यप्राशन केल्यानंतर वाहन चालवणे धोकादायक असून, तो कार चालवत असताना झोपला असता तर मोठा अपघात घडू शकला असता, असे अनेकांनी म्हटले आहे.
तर काही नेटकऱ्यांनी या घटनेकडे विनोदी दृष्टीने पाहत चालकाच्या गाढ झोपेची मजा घेतली. ‘झोप असावी तर अशी’, ‘दारू प्यायलेला माणूस कुठेही झोपू शकतो’, अशा मजेशीर प्रतिक्रिया सोशल मीडियावर पाहायला मिळत आहेत.
