First Apache helicopters for Indian Army Arrival Jodhpur Army Induction Western Sector Deployment
जोधपूर: भारताच्या लष्करी क्षमतेत मोठी वाढ घडवणारी घडामोड समोर आली आहे. अमेरिकेच्या बोईंग कंपनीने बनवलेली तीन आधुनिक AH-64E Apache Guardian हल्लेखोर हेलिकॉप्टर्स लवकरच जोधपूरमध्ये दाखल होणार आहेत. सूत्रांच्या माहितीनुसार, ही हेलिकॉप्टर्स 22 जुलै 2025 रोजी अधिकृतपणे भारतीय लष्करात सामील केली जाणार आहेत.
ही तीन हेलिकॉप्टर्स भारतीय लष्करासाठी खरेदी करण्यात आलेल्या एकूण सहा अपाचे हेलिकॉप्टर्सपैकी पहिली तुकडी आहे. या युनिटसाठी जोधपूरमध्ये आधीच एक नवीन लष्करी हेलिकॉप्टर स्क्वॉड्रन उभारण्यात आलेला आहे. ही तुकडी भारत-पाकिस्तान सीमावर्ती पश्चिम भागात तैनात केली जाणार आहे.
हेलिकॉप्टर्स जोधपूरमध्ये आज किंवा उद्या (20 किंवा 21 जुलै) दाखल होणार असून, त्यानंतर लष्करी परंपरेनुसार संयुक्त प्राप्ती तपासणी (Joint Receipt Inspection - JRI) पार पडेल. त्यानंतरच अधिकृत समावेशाची घोषणा केली जाईल.
भारतीय हवाई दलाने 2015 मध्ये 22 अपाचे हेलिकॉप्टर्स खरेदी केली होती. मात्र, प्रथमच भारतीय लष्कराच्या ताफ्यात ही हेलिकॉप्टर्स दाखल होणार आहेत. 2020 मध्ये भारत सरकारने लष्करासाठी सहा AH-64E अपाचे हेलिकॉप्टर्स खरेदीसाठी अंदाजे 60 कोटी डॉलर्सचा करार मंजूर केला होता.
बोईंगने त्या वेळी म्हटलं होतं की, "या ऑर्डरमुळे भारतीय लष्कराची युद्धभूमीवर हवाई मदत देण्याची क्षमता लक्षणीयपणे वाढेल."
शत्रूच्या नजरेपासून वाचून लक्ष्यभेद करणारी प्रणाली
30 मिमी चेन गन, Hellfire क्षेपणास्त्रे, आणि रॉकेट पॉड्स यांसारखी प्रचंड मारकशक्ती
Longbow रडार प्रणाली, जी हेलिकॉप्टरला झाडीत किंवा अडथळ्यांमधूनही शत्रू ओळखण्याची क्षमता देते
दिवस व रात्र दोन्ही काळात ऑपरेट होणारी लक्ष्य प्रणाली (Target Acquisition Designation System)
दाट धूळ, पाऊस, कोहरा यामध्येही कार्यक्षमतेने ऑपरेट होण्याची क्षमता
मजबूत इंजिन्स आणि संरक्षित रोटर ब्लेड्समुळे अत्यंत प्रतिकूल परिस्थितीतही टिकाव धरते
अपाचे हेलिकॉप्टर्स लष्कराच्या ताफ्यात समाविष्ट झाल्याने, जमिनीवरील लढाईदरम्यान हवाई मदतीचा वेळ कमी होईल आणि लष्कर स्वतःच्या नियंत्रणातील हल्लेखोर हवाई तुकड्यांमुळे अधिक प्रभावी बनणार आहे.
ही हेलिकॉप्टर्स "हल्ला कर आणि सुरक्षित परत ये" अशा रणनीतीसाठी जगभरात ओळखली जातात. अधिकृत घोषणेची अद्याप प्रतीक्षा असली तरीही, लष्करासाठी ही एक ऐतिहासिक घडामोड ठरणार आहे.
