Saudi Arabia Sleeping Prince Al Waleed bin Khaled death 20 years in Coma
रियाध : जवळपास 20 वर्षांपासून कोमामध्ये असलेल्या सौदी अरेबियाच्या राजघराण्यातील प्रिन्स अल वलीद बिन खालिद बिन तलाल अल साऊद यांचे निधन झाले आहे. वयाच्या 15 व्या वर्षी झालेल्या दुर्दैवी अपघातानंतर ते कोमामध्ये गेले होते आणि आज वयाच्या 36 व्या वर्षी त्यांनी अखेरचा श्वास घेतला.
प्रिन्स अल वलीद हे प्रिन्स खालिद बिन तलाल अल साऊद यांचे जेष्ठ पुत्र होते. ते अरब अब्जाधीश प्रिन्स अल वलीद बिन तलाल यांचे पुतणे होते.
एप्रिल 1990 मध्ये जन्मलेले प्रिन्स अल वलीद लंडनमधील एका मिलिटरी कॉलेजमध्ये शिक्षण घेत असताना 2005 साली एका रस्ते अपघातात गंभीर जखमी झाले.
त्यांना मेंदूची गंभीर दुखापत झाली आणि अंतर्गत रक्तस्राव झाला. या अपघातानंतर ते कोमामध्ये गेले आणि कधीच पूर्णतः शुद्धीवर आले नाहीत.
त्यांच्यावर अमेरिका आणि स्पेनमधून आलेल्या तज्ज्ञ डॉक्टरांकडून वैद्यकीय उपचार करण्यात आले. त्यानंतर त्यांना रियाधमधील किंग अब्दुलअझीझ मेडिकल सिटी येथे हलवण्यात आले, जिथे गेली दोन दशके ते जीवनसत्त्व प्रणालीच्या साहाय्याने जीवंत होते.
त्यांचे वडील प्रिन्स खालिद यांनी अनेकदा जाहीरपणे जीवनसत्त्व काढण्याच्या सूचनांचा विरोध केला होता आणि दिव्य उपचाराच्या आशेवर ते चिकटून राहिले.
त्यांच्या कोमाच्या काळात काही वेळा हाताची बोटं हलवताना दिसल्याचे व्हिडिओ सोशल मीडियावर व्हायरल झाले होते, ज्यामुळे चाहत्यांमध्ये आशेचे किरण दिसले होते. त्यामुळेच त्यांना "स्लीपिंग प्रिन्स" म्हणून ओळखले जाऊ लागले.
त्यांच्या निधनाबाबत एक भावनिक निवेदन करत प्रिन्स खालिद यांनी सांगितले की, "अल्लाहच्या हुकमावर आणि नियतीवर पूर्ण विश्वास ठेवून, अत्यंत दु:ख आणि खिन्नतेने आम्ही आमच्या लाडक्या पुत्राच्या निधनाची बातमी देत आहोत. अल्लाह त्यांना आपल्या दयेमध्ये स्थान देवो."
ग्लोबल इमाम्स कौन्सिलने देखील शोक व्यक्त करत म्हटले, "सौदी राजघराण्याचे तसेच मोहम्मद बिन सलमान यांचे आम्ही मन:पूर्वक सांत्वन करतो. जवळपास वीस वर्षे मृत्यूशी झुंज देणाऱ्या प्रिन्स अल वलीद यांना अल्लाह शांती देवो."
त्यांच्यावर अंत्यसंस्कार 20 जुलै 2025 रोजी, रविवारी, रियाध येथील इमाम तुर्की बिन अब्दुल्ला मशीद येथे आसरच्या नमाजीनंतर करण्यात येणार आहेत.
दरम्यान, सौदी अरेबियाचे प्रिन्स अल वलीद बिन खालिद यांच्या वैयक्तिक संपत्तीबाबत कोणतीही स्पष्ट माहिती नाही. ते सौदी राजघराण्याचे सदस्य होते, त्यामुळे त्यांच्या कुटुंबाकडे भरपूर संपत्ती आणि शाही सन्मान होते.
त्यांच्या जीवनशैलीत राजेशाही ठसा होता, पण त्यांनी स्वतःची संपत्ती निर्माण केली नव्हती. त्यांचे काका प्रिन्स अल वलीद बिन तलाल हे एक प्रसिद्ध अब्जाधीश आहेत. त्यांना "सौदीचा वॉरेन बफे" म्हणून ओळखले जातात.
