नवी दिल्ली : राष्ट्रीय तपास संस्थेने शनिवारी मुंबई दहशतवादी हल्ल्यातील सूत्रधार तहव्वुर राणाच्या आवाजाचे आणि हस्ताक्षराचे नमुने घेतले. दिल्लीतील पतियाळा न्यायालयात दहशतवादी राणाचा आवाज आणि लिखाणाचे नमुने घेण्यात आले. यासाठी राणाला कडक सुरक्षेत न्यायदंडाधिकारी वैभव कुमार यांच्यासमोर हजर करण्यात आले. यावेळी दहशतवादी राणाने विविध अक्षरे आणि संख्यात्मक अक्षरे लिहिली, असे सूत्रांनी सांगितले.
पतियाळा न्यायालयाने दहशतवादी तहव्वुर राणाच्या आवाजाचे आणि हस्ताक्षराचे नमुने घेण्याची परवानगी एनआयएला दिली होती. त्यानुसार ही कारवाई करण्यात आली आहे. एनआयएचे अधिकारी चौकशीसाठी याचा वापर करणार आहेत. दरम्यान, दहशतवादी राणा १० एप्रिल पासून एनआयएच्या कोठडीत असून संस्थेच्या मुख्यालयात त्याची कसून चौकशी सुरु आहे. विशेष एनआयए न्यायाधीश चंदरजीत सिंग यांनी २८ एप्रिल रोजी राणाच्या एनआयए कोठडीत १२ दिवसांची वाढ केली होती.
