दिल्ली: भारत पाकिस्तान तणावाच्या पार्श्वभूमीवर केंद्र सरकारने महत्त्वपूर्ण पाऊल उचलले आहे. पाकिस्तानात तयार होणाऱ्या सर्व प्रकारच्या डिजिटल कंटेंटवर बंदी घालण्याचे आदेश केंद्राने दिले आहेत. केंद्र सरकारने ओटीटी, मीडिया स्ट्रीमिंग प्लॅटफॉर्मना आज (दि.८) महत्त्वपूर्ण आदेश दिले आहेत.
२२ एप्रिल रोजी जम्मू आणि काश्मीरमध्ये झालेल्या पहलगाम हल्ल्यानंतर सुरक्षा उपाययोजनांच्या मालिकेतील नवीनतम घटना म्हणजे, सरकारने गुरुवारी (दि.८) ऑनलाइन स्ट्रीमिंग प्लॅटफॉर्मना सर्व मूळचा पाकिस्तानी कंटेंट ताबडतोब बंद करण्याचे निर्देश दिले. भारत-पाकिस्तान तणावाच्या पार्श्वभूमीवर राष्ट्रीय सुरक्षेच्या हितासाठी भारताने हे महत्त्वपूर्ण पाऊल उचलले आहे.
माहिती आणि प्रसारण मंत्रालयाने जारी केलेल्या आदेशात, "भारतातील सर्व ओटीटी प्लॅटफॉर्म, मीडिया स्ट्रीमिंग सेवा आणि भारतात कार्यरत असलेल्या मध्यस्थांना निर्देश देण्यात आले आहेत. सबस्क्रिप्शनआधारित मॉडेल्सद्वारे किंवा इतर कोणत्याही प्रकारे ऑफर केलेले पाकिस्तानी वेब सिरीज, चित्रपट, गाणी, पॉडकास्ट आणि पाकिस्तानमधून येणारे इतर स्ट्रीमिंग कंटेंट ताबडतोब बंद करण्यास सांगितले आहे." "राष्ट्रीय सुरक्षेच्या हितासाठी" हा निर्णय घेण्यात आला आहे, असे अधिसूचनेत म्हटले आहे.
पहलगाम दहशतवादी हल्ल्यानंतर दोन्ही देशांमधील वाढत्या तणावाच्या पार्श्वभूमीवर, भारतीय सैन्याने पाकिस्तान आणि पाकव्याप्त काश्मीरमधील दहशतवादी छावण्यांवर हल्ला केल्यानंतर एका दिवसानंतर सरकारचे हे निर्देश आहेत.
यापूर्वी, भारताने १५ हून अधिक पाकिस्तानी युट्यूब चॅनेलवर बंदी घातली होती. ज्यामध्ये डॉन आणि जिओ न्यूज सारख्या प्रमुख माध्यमांचे तसेच इर्शाद भट्टी, अस्मा शिराजी आणि उमर चीमा सारख्या पत्रकारांचा समावेश होता. भारताविरुद्ध प्रक्षोभक, सांप्रदायिकदृष्ट्या संवेदनशील सामग्री आणि खोट्या कथा पसरवल्याचा आरोप भारताने केला होता. माजी क्रिकेटपटू शोएब अख्तरचे युट्यूब चॅनेल देखील भारतातून काढून टाकण्यात आले होते, ज्याचे ३.५ दशलक्षाहून अधिक सबस्क्राइबर होते. एकत्रितपणे, बंदी घातलेल्या प्लॅटफॉर्मची एकूण फॉलोअर्स संख्या सुमारे ६.३ कोटी होती, असेही वृत्तातून समोर आले आहे.
