पुढारी ऑनलाईन डेस्क : भारतीय जनता पक्षाचे (भाजप) ज्येष्ठ नेते लालकृष्ण अडवाणी (97) यांची प्रकृती पुन्हा एकदा अचानक बिघडली आहे. रात्री उशिरा त्यांना दिल्लीतील अपोलो रुग्णालयात उपचारासाठी दाखल करण्यात आले. लालकृष्ण अडवाणी गेल्या काही दिवसांपासून अस्वस्थ होते. लालकृष्ण अडवाणी यांना गेल्या चार ते पाच महिन्यांत चौथ्यांदा रुग्णालयात दाखल करण्यात आले आहे. यापूर्वी ऑगस्ट महिन्यात त्यांना रुग्णालयात दाखल करण्यात आले होते.
मीडिया रिपोर्ट्सनुसार, लालकृष्ण अडवाणी हे गेल्या काही काळापासून आरोग्याशी संबंधित समस्यांशी झुंजत आहेत. याच वर्षी त्यांना देशाचा सर्वोच्च सन्मान भारतरत्नही देण्यात आला. आरोग्याच्या समस्यांमुळे ते राष्ट्रपती भवनातील कार्यक्रमाला उपस्थित राहू शकले नाहीत. त्यांना त्यांच्या निवासस्थानीच भारतरत्न प्रदान करण्यात आला.
8 नोव्हेंबर रोजी पंतप्रधान नरेंद्र मोदी भाजपचे ज्येष्ठ नेते लालकृष्ण अडवाणी यांच्या वाढदिवसाच्या शुभेच्छा देण्यासाठी त्यांच्या निवासस्थानी पोहोचले होते. पीएम मोदींनी सोशल मीडिया प्लॅटफॉर्म X वर एक फोटो देखील शेअर केला होता, ज्यामध्ये पीएम मोदी लालकृष्ण अडवाणींना पुष्पगुच्छ देताना दिसत होते. पीएम मोदींनी फोटोच्या कॅप्शनमध्ये लिहिले होते की, “आडवाणीजींच्या निवासस्थानी भेट दिली आणि त्यांना वाढदिवसाच्या शुभेच्छा दिल्या.”
