Samay Raina Supreme Court: कॉमेडियन समय रैनाला सुप्रीम कोर्टाकडून मोठा दिलासा मिळाला आहे. ‘इंडियाज गॉट लॅटेंट’ या शोमध्ये दिव्यांग व्यक्तींबाबत केलेल्या कथित आक्षेपार्ह आणि असंवेदनशील वक्तव्यांप्रकरणी समय रैना आणि इतर चार जणांविरोधात दाखल करण्यात आलेले सर्व FIR रद्द करण्याचे आदेश सुप्रीम कोर्टाने दिले आहेत.
या प्रकरणात दाखल करण्यात आलेल्या याचिकेवर सुनावणी करताना न्यायालयासमोर समय रैना आता दिव्यांग व्यक्तींसाठी काम करणाऱ्या संस्थेच्या संपर्कात असल्याची माहिती देण्यात आली होती.
याचिकाकर्त्या NGOने न्यायालयाला सांगितले की, समय रैना आता त्यांच्या संपर्कात आहे. तसेच स्पाइनल मस्क्युलर अॅट्रॉफी (SMA) या आजाराबद्दल जनजागृती करण्यासाठी आणि रुग्णांना मदत करण्यासाठी तो काम करण्यास तयार आहे.
यानंतर सुप्रीम कोर्टाने समय रैना आणि इतर आरोपींविरोधातील फौजदारी कारवाई संपवण्याचा निर्णय घेतला. न्यायालयाने यावेळी चांगल्या हेतूने केलेल्या प्रयत्नांचे कौतुकही केले. योग्य दिशेने काम सुरू केल्यास त्याचे चांगले परिणाम मिळू शकतात, असे न्यायालयाने म्हटले.
या प्रकरणातील FIR रद्द करण्यात आला असला तरी दिव्यांग व्यक्तींविषयी असंवेदनशील किंवा आक्षेपार्ह कंटेंट तयार होऊ नये, यासाठी पुढे काय करता येईल, यावर सुप्रीम कोर्ट विचार करणार आहे.
यासाठी दिव्यांग व्यक्ती आणि संबंधित संस्थांकडून सूचना घेण्याची तयारी न्यायालयाने दर्शवली आहे. अशा प्रकारच्या कंटेंटवर अधिक चांगल्या पद्धतीने नियंत्रण किंवा देखरेख कशी ठेवता येईल, याबाबत पुढे मार्गदर्शक सूचना तयार करण्याचा विचार केला जाणार आहे.
सुप्रीम कोर्टाने आपल्या आदेशात समय रैना आणि इतर संबंधित आरोपींविरोधातील फौजदारी कारवाई रद्द केली आहे. या प्रकरणाशी संबंधित उर्वरित कार्यवाहीही बंद करण्यात आली आहे. मात्र दिव्यांग व्यक्तींच्या हक्कांशी आणि अशा प्रकारच्या कंटेंटच्या नियमनाशी संबंधित मुद्द्यावर सुनावणी पुढे सुरू राहणार आहे.
‘इंडियाज गॉट लॅटेंट’चा संबंधित भाग 14 नोव्हेंबर 2024 रोजी मुंबईतील खार हैबिटॅट येथे शूट करण्यात आला होता. हा भाग नंतर ऑनलाइन प्रसारित करण्यात आला.
या कार्यक्रमातील काही वक्तव्यांवरून मोठा वाद निर्माण झाला होता. विशेषतः दिव्यांग व्यक्तींबाबत केलेल्या कथित असंवेदनशील वक्तव्यांमुळे समय रैना आणि इतर कॉमेडियन व इन्फ्लुएन्सर्सविरोधात विविध ठिकाणी गुन्हे दाखल करण्यात आले होते.
आता सुप्रीम कोर्टाच्या निर्णयामुळे समय रैनाला या प्रकरणात मोठा दिलासा मिळाला आहे. मात्र दिव्यांग व्यक्तींविषयी संवेदनशील कंटेंट कसा तयार केला जावा आणि अशा कंटेंटवर देखरेख कशी ठेवावी, हा व्यापक मुद्दा अद्याप न्यायालयासमोर कायम आहे.
