Prateek Yadav death cause
लखनौ: समाजवादी पक्षाचे संस्थापक दिवंगत मुलायम सिंह यादव यांचे पुत्र प्रतीक यादव (३८) यांचा मृत्यू फुफ्फुसातील रक्तवाहिन्यांमध्ये मोठ्या प्रमाणात अडथळा (ब्लॉक) निर्माण झाल्यामुळे झाला असून, यामुळे त्यांचे हृदय आणि श्वसनसंस्था निकामी झाली, असा खुलासा शवविच्छेदन (Post-mortem) अहवालातून झाला आहे.
शवविच्छेदन अहवालातील निष्कर्षांनुसार, मृत्यूचे तात्पुरते कारण "मॅसिव्ह पल्मोनरी थ्रोम्बोइम्बोलिझममुळे (Massive Pulmonary Thromboembolism) हृदय आणि श्वसनसंस्था निकामी होणे" असे नोंदवण्यात आले आहे. डॉक्टरांच्या मते एका मोठ्या रक्ताच्या गाठीने फुफ्फुसातील रक्तप्रवाह रोखला होता, ज्यामुळे त्यांचे हृदय आणि श्वास घेण्याची प्रक्रिया थांबली.
अहवालात नमूद करण्यात आले आहे की, डॉक्टरांनी संपूर्ण हृदय आणि फुफ्फुसातून मिळालेली रक्ताच्या गाठीसारखी सामग्री पुढील सविस्तर 'हिस्टोपॅथॉलॉजिकल' तपासणीसाठी 'फॉर्मेलिन'मध्ये जतन करून ठेवली आहे. तसेच, कोणताही इतर वैद्यकीय किंवा विषारी घटक कारणीभूत नाही ना, याची खात्री करण्यासाठी फॉरेन्सिक प्रक्रियेचा भाग म्हणून 'व्हिसेरा' नमुने देखील रासायनिक विश्लेषणासाठी पाठवण्यात आले आहेत.
सूत्रांनी दिलेल्या माहितीनुसार, फॉरेन्सिक तज्ज्ञ आता या नमुन्यांची प्रयोगशाळेत चाचणी करतील, जेणेकरून त्या गाठीचे नेमके स्वरूप आणि उगम समजू शकेल. तसेच, त्यांच्या मृत्यूला एखादा जुना आजार किंवा बाह्य घटक कारणीभूत होता का, याचाही शोध घेतला जाईल.
शवविच्छेदन अहवालात असेही नमूद करण्यात आले आहे की, शरीरावर आढळलेल्या सर्व जखमा या 'अँटीमॉर्टम' (मृत्यूच्या आधीच्या) आहेत. मात्र, अंतिम फॉरेन्सिक आणि रासायनिक अहवाल प्राप्त होईपर्यंत या जखमांच्या स्वरूपाबाबत कोणताही ठोस निष्कर्ष काढता येणार नाही, असे अधिकाऱ्यांनी स्पष्ट केले आहे. उत्तर प्रदेशातील सर्वात प्रतिष्ठित राजकीय कुटुंबातील असूनही प्रसिद्धीच्या झोतात न राहणे पसंत करणाऱ्या प्रतीक यादव यांचे बुधवारी लखनौमध्ये निधन झाले.
