BJP first Woman President Nirmala Sitharaman Purandeswari Vanathi Srinivasan JP Nadda Successor RSS 33% Women Reservation Lok Sabha
नवी दिल्ली : भारतीय जनता पक्षाच्या (भाजप) अध्यक्षपदावरून चाललेल्या चर्चांमध्ये आता एक ऐतिहासिक निर्णय होण्याची शक्यता निर्माण झाली आहे. पक्षाच्या अध्यक्षपदी प्रथमच एका महिलेची नियुक्ती होऊ शकते, अशी माहिती सूत्रांनी दिली आहे.
या पदासाठी केंद्रीय अर्थमंत्री निर्मला सीतारामन, आंध्र प्रदेश भाजपच्या माजी अध्यक्ष डी. पुरंदेश्वरी आणि तामिळनाडूच्या आमदार वनाथी श्रीनिवासन या प्रमुख दावेदार आहेत.
जेपी नड्डा यांचा कार्यकाळ जानेवारी 2023 मध्येच संपला होता, परंतु लोकसभा निवडणुकीसाठी त्यांच्या कार्यकाळात जून 2024 पर्यंत वाढ करण्यात आली होती.
आता नवीन अध्यक्षाची निवड करताना पक्षात मतभेद दिसून येत आहेत. या पार्श्वभूमीवर महिला अध्यक्ष निवडण्याचा निर्णय हा पक्षासाठी एक निर्णायक आणि ऐतिहासिक टप्पा ठरेल.
केंद्रीय अर्थमंत्री आणि माजी संरक्षण मंत्री असलेल्या सीतारामन यांचं नाव प्रमुख दावेदारांमध्ये असून, त्यांनी नुकतीच भाजप मुख्यालयात अध्यक्ष जे. पी. नड्डा आणि सरचिटणीस बी. एल. संतोष यांच्यासोबत उच्चस्तरीय बैठक घेतली.
त्यांचं अनुभवसंपन्न नेतृत्व, दक्षिण भारतातील प्रभाव आणि राष्ट्रीय स्तरावरील सक्षमता लक्षात घेता त्या मजबूत दावेदार मानल्या जात आहेत.
आंध्र प्रदेश भाजपच्या माजी अध्यक्ष असलेल्या डी. पुरंदेश्वरी यांचं नावही भाजप अध्यक्षपदासाठी चर्चेत आहे. त्या एक बहुभाषिक नेत्या असून त्यांचा अनुभव आणि राजकीय कारकीर्द अनेक पक्षांमधून सिध्द झालेली आहे. त्यांनी परराष्ट्र दौऱ्यावर "ऑपरेशन सिंदूर" मध्ये प्रतिनिधित्व केलं होतं.
तामिळनाडूतील कोयंबतूर साउथ येथून आमदार असलेल्या वनाथी श्रीनिवासन या देखील अध्यक्षपदासाठी चर्चेत आहेत. 1993 पासून भाजपमध्ये कार्यरत असलेल्या वनाथी यांनी राज्य सचिव, सरचिटणीस आणि तामिळनाडू प्रदेश उपाध्यक्षपद सांभाळलं आहे.
2020 मध्ये त्यांना भाजप महिला मोर्चाच्या अध्यक्षपदी नेमण्यात आलं आणि 2022 मध्ये त्या पक्षाच्या केंद्रीय निवडणूक समितीच्या सदस्य झाल्या – त्या तामिळनाडूतील पहिल्या महिला होत्या ज्यांना हे पद मिळालं.
राष्ट्रीय स्वयंसेवक संघाने (RSS) देखील महिला नेतृत्वाच्या कल्पनेला पाठिंबा दिला आहे. महिलांचं प्रतिनिधित्व वाढवणं आणि पक्षाच्या महिला मतदारांशी मजबूत संबंध निर्माण करणं, ही रणनीती संघाच्या दृष्टीने महत्त्वाची ठरत आहे.
विशेषतः महाराष्ट्र, हरियाणा, आणि दिल्लीसारख्या राज्यांमध्ये महिला मतदारांनी भाजपच्या विजयात मोलाचा वाटा उचलला आहे.
जर भाजप महिला अध्यक्षाची निवड करत असेल, तर हा पक्षाच्या इतिहासात पहिलाच प्रसंग असेल. 33 टक्के महिला आरक्षणाच्या पार्श्वभूमीवर आणि नवीन मतदारसंघ पुनर्रचनेनंतर लागू होणाऱ्या महिला प्रतिनिधित्व धोरणाशी भाजपचा हा निर्णय सुसंगत ठरेल, असे मानले जात आहे.
दरम्यान, पक्षांतर्गत वाद आणि निवडणुकीनंतरच्या रणनीतीच्या पार्श्वभूमीवर भाजपकडून महिला अध्यक्षाची नियुक्ती ही केवळ प्रतीकात्मक नसून, एक सशक्त राजकीय संदेश ठरेल. पुढील काही दिवसांत याबाबत अधिकृत घोषणा होण्याची शक्यता आहे.
