PM Narendra Modi Live: पंतप्रधान नरेंद्र मोदी आज काय बोलणार? संध्याकाळी 8.30 वाजता संबोधन

पंतप्रधान नरेंद्र आज (शनिवारी, 18 April 2026) रात्री देशाला संबोधित करणार आहेत. लोकसभेत महिला आरक्षण विधेयक विरोधकांनी बहुमताने फेटाळल्याच्या पार्श्वभूमीवर मोदी संबोधित करणार असल्याने ते नेमके काय बोलणार याकडे देशभराचे लक्ष लागले आहे.

शुक्रवारी सर्वच विरोधी पक्षांनी अभूतपूर्व एकजूट दाखवत महिला आरक्षण दुरुस्ती विधेयकाच्या विरोधात मतदान केल्याने हे विधेयक लोकसभेत नामंजूर करण्यात आले. या विधेयकाच्या बाजूने २९८, तर विरोधात २३० मते पडली. केंद्र सरकारचे अत्यंत महत्त्वाकांक्षी विधेयक लोकसभेने फेटाळल्याने लोकसभेत मोदी सरकारचा दारुण पराभव झाला होता. हे विधेयक फेटाळल्यानंतर उर्वरित मतदारसंघ पुनर्रचना आणि केंद्रशासित प्रदेश कायदे (सुधारणा) विधेयक, २०२६ ही दोन्ही विधेयके सरकारला मागे घ्यावी लागल्याने नामुष्की ओढवली होती.

डीएमकेकडे तामिळनाडूच्या जनतेला दाखवायला विकासकामेच नाहीत. म्हणूनच त्यांनी राज्यातील जागा कमी होणार असल्याचा अपप्रचार केला. सर्वसामान्य कुटुंबातील महिलांच्या प्रगतीमध्ये विरोधी पक्ष अडथळे का आणत आहे, असा सवाल मोदींनी तामिळनाडूतील प्रचारसभेत विचारला आहे.

काँग्रेसने संविधान समजून घेतले पाहिजे. मतदारसंघांची पुनर्रचना केल्याशिवाय संसदेतील किंवा राज्य विधानसभांमधील जागांच्या संख्येत फेरबदल करणे शक्य नाही, असे भाजप नेते रविशंकर प्रसाद यांनी सांगितले.

पंतप्रधान नरेंद्र मोदींचे संबोधन म्हणजे एकपात्री प्रयोग असतात. त्यात कुठेही चर्चा नसते. गेल्या 15 वर्षात मोदींनी एकही पत्रकार परिषद घेतली नाही. जनतेला आता मोदीजी काय बोलतात यात रस नाही, अशी टीका तृणमूल काँग्रेसने केली आहे.

आज पंतप्रधान नरेंद्र मोदी रात्री साडे आठ वाजता देशातील महिलांशी संवाद साधणार आहे. देशभरातील महिला लोकसभेत विधेयक नामंजूर झाल्याने संतप्त झाल्या आहेत, अशी प्रतिक्रिया हेमा मालिनी यांनी दिली.

आज काम बाजूला ठेवा आणि मोदीजींना ऐका. मोदींनी महिलांना आरक्षण देण्याचा निर्णय घेतला. पण विरोधकांनी विधेयक नामंजूर केले. देशातील नारीशक्ती आता व्यक्त होतेय आणि उद्या ते आप-काँग्रेसला सडेतोड प्रत्युत्तर देणार, असे भाजप खासदार मनोज तिवारींनी सांगितले.