पुढारी ऑनलाईन डेस्क : दिल्लीतील १५ वर्षांपेक्षा जुन्या वाहनांना ३१ मार्चनंतर पेट्रोल आणि डिझेल मिळणार नाही, अशी घोषणा पर्यावरण मंत्री मनजिंदर सिंग सिरसा यांनी आज (दि. १ मार्च) केली. राजधानीतील वाढत्या प्रदूषणावर नियंत्रण ठेवण्यासाठी हा निर्णय घेण्यात आला आहे. १५ वर्षांपेक्षा जुन्या वाहनांचीओळख पटविण्यासाठी एक विशेष पथक तयार केले जाईल, अशीही माहिती त्यांनी दिली.
प्रदूषण नियंत्रित करण्यासाठी, दिल्लीतील मोठी हॉटेल्स, काही मोठी ऑफिस कॉम्प्लेक्स, दिल्ली विमानतळ, मोठ्या बांधकाम स्थळांना प्रदूषण नियंत्रित करण्यासाठी त्वरित अँटी-स्मॉग गन बसवणे बंधनकारक असणार आहे. क्लाउड सीडिंगसाठी आम्हाला आवश्यक असलेली कोणतीही परवानगी घेऊ आणि दिल्लीमध्ये जेव्हा गंभीर प्रदूषण असेल तेव्हा क्लाउड सीडिंगद्वारे पाऊस पाडता येईल आणि प्रदूषण नियंत्रित करता येईल याची आम्ही खात्री करू, अशीही माहिती मनजिंदर सिंग सिरसा यांनी दिली.
