पुढारी ऑनलाईन डेस्क : नायब सिंह सैनी यांची हरियाणा भाजप विधिमंडळ पक्षाच्या नेतेपदी निवड करण्यात आली आहे. ते १७ ऑक्टोबर रोजी दुसऱ्यांदा हरियाणाच्या मुख्यमंत्रीपदी शपथ घेतील.
नुकत्याच झालेल्या निवडणुकीत हरियाणात ९० पैकी ४८ जागा भाजपने जिंकल्या. यामुळे भाजप हरियाणात सलग तिसऱ्यांदा सत्ता सत्ता स्थापन करत आहे. राज्यात सत्तेची हॅट्ट्रिक करणारा भाजप हा पहिला पक्ष आहे. हरियाणा विधानसभा निवडणुकीच्या सहा महिने आधी नायब सिंह सैनी यांना मुख्यमंत्री बनवण्यात आले होते. आता पुन्हा एकदा भाजपने त्यांच्या हाती नेतृत्व दिले आहे.
माजी मुख्यमंत्री मनोहर लाल खट्टर यांचे निकटवर्ती अशी ओळख असणार्या नायब सिंह सैनी यांचा जन्म २५ जानेवारी १९७० रोजी अंबाला येथील मिर्झापूर माजरा गावात झाला. बीए. एलएलबी असे त्यांचे शिक्षण झाले आहे. सैनी हे राष्ट्रीय स्वयंसेवक संघाशी संबंधित आहेत. ओबीसी समाजातील नेते, अशीही त्यांची ओळख आहे. ते २००२ मध्ये युवा मोर्चा भाजप अंबालाचे जिल्हा सरचिटणीस झाले. २००५ मध्ये ते युवा मोर्चा भाजप अंबालाचे जिल्हाध्यक्ष होते. सैनी २००९ मध्ये किसान मोर्चा भाजप हरियाणाचे प्रदेश सरचिटणीसही होते. २०१२ मध्ये ते अंबाला भाजपचे जिल्हाध्यक्ष झाले. २०१४ मध्ये सैनी यांनी नारायणगड विधानसभेतून निवडणूक जिंकली. २०१६ मध्ये त्यांनी हरियाणा सरकारमध्ये मंत्रीपद भूषवले होते. २०१९ लोकसभा निवडणुकीत कुरुक्षेत्र मतदारसंघातून निवडणूक जिंकले होते. लोकसभा निवडणुकीपूर्वी त्यांच्याकडे मुख्यमंत्रीपदाची जबाबदारी सोपविण्यात आली होती. आता त्यांच्या नेतृत्त्वाखालील भाजपने हरियाणात तिसऱ्यांदा सत्ता मिळवली आहे.
