Hyderabad live death video
हैदराबाद : खेळताना किंवा व्यायाम करताना हृदयविकाराच्या झटक्याने तरुणांचा मृत्यू होण्याच्या घटनांमध्ये वाढ होत असतानाच, हैदराबादमधून आणखी एक धक्कादायक घटना समोर आली आहे. येथील उप्पल स्टेडियममधील इनडोअर कोर्टवर बॅडमिंटन खेळत असताना गुंडला राकेश (वय २५) नावाचा तरुण अचानक कोसळला आणि त्याचा मृत्यू झाला. हृदयविकाराच्या तीव्र झटक्याने त्याचा मृत्यू झाल्याचा संशय व्यक्त करण्यात येत आहे.
राकेश हा हैदराबादमधील एका खासगी कंपनीत नोकरी करत होता. हैदराबादच्या उप्पल स्टेडियममधील इनडोअर कोर्टवर राकेश आपल्या सहकाऱ्यांसोबत बॅडमिंटन खेळत होता. याच दरम्यान, तो शटल कॉक उचलण्यासाठी जात असताना खाली कोसळला आणि जागीच त्याचा मृत्यू झाला. व्हायरल झालेल्या व्हिडिओमध्ये दिसत आहे की, त्याचे मित्र तात्काळ त्याच्याजवळ धाव घेतात. ते त्याला उचलण्याचा खूप प्रयत्न करतात, पण तो कोणताही प्रतिसाद देत नाही. यानंतर, त्याला तातडीने रुग्णालयात दाखल करण्यात आले, परंतु तेथे डॉक्टरांनी त्याला मृत घोषित केले. या घटनेने क्रीडा क्षेत्रात आणि तरुणांमध्ये चिंतेचे वातावरण पसरले आहे.
गेल्या काही दिवसांपासून अशा प्रकारच्या मृत्यूंच्या घटनांमध्ये सातत्याने वाढ होत आहे. यामध्ये सर्वाधिक बळी जाणारा वर्ग तो आहे, जो अत्यंत तंदुरुस्त मानला जातो. २५ ते ३५ वयोगटातील तरुण अचानक मृत्यूच्या कवेत जात आहेत. राकेशच्या बाबतीतही असेच घडले आहे. राकेशचे वय अवघे २५ वर्षे होते. तो पूर्णपणे सक्रिय होता आणि बॅडमिंटनसारखा खेळ खेळत असल्याने तंदुरुस्तही होता. अशा परिस्थितीत, त्याचा मृत्यू सध्या एक गूढ बनून राहिला आहे.
