जम्मू-काश्मीर विधानसभा प्रचारासाठी खासदार राशीद इंजिनियरला जामीन

नवी दिल्ली, पुढारी वृत्तसेवा : दिल्लीच्या पटियाला हाऊस न्यायालयाने जम्मू-काश्मीरच्या बारामुल्ला मतदारसंघाचे खासदार शेख राशीद उर्फ राशीद इंजिनियरला अंतरिम जामीन दिला आहे. न्यायालयाने जम्मू-काश्मीर विधानसभा निवडणुकीच्या प्रचारासाठी दहशतवादी फंडिंग प्रकरणात २ ऑक्टोबरपर्यंत अंतरिम जामीन मंजूर केला आहे.

बारामुल्ला लोकसभा मतदारसंघाचे खासदार राशीद इंजिनियर २०१७ च्या दहशतवादी फंडिंग प्रकरणात दिल्लीच्या तिहार तुरुंगात आहेत. या बेकायदेशीर कारवाया प्रतिबंधक कायदा (यूएपीए) नुसार राशीदवर कारवाई करण्यात आली आहे. आता विधानसभा निवडणुकीच्या प्रचारासाठी अंतरिम जामीनाची मागणी राशीदने केली. त्यानंतर न्यायालयाने अंतरिम जामीन मंजूर केला.