60 सेकंदात 25 पुलअप्स! 56 वर्षीय मेजर जनरलच्या ‘फिटनेस’ने नेटकरी अवाक

पुढारी ऑनलाईन डेस्क : indian army major general video : लहान वयातच तंदुरुस्त राहता येते असे म्हणणे पूर्णपणे चुकीचे आहे, परंतु वयाच्या 50 पेक्षा जास्त झाल्यावरही तुम्ही तंदुरुस्त राहू शकता. अलीकडे 56 वर्षीय मेजर जनरल यांचा व्हिडिओ सोशल मीडियावर मोठ्या प्रमाणात व्हायरल होत आहे. मेजर जनरल प्रसन्न जोशी यांनी जिममध्ये अवघ्या 60 सेकंदात न थांबता 25 पुलअप्स मारले. वयाच्या 56 व्या वर्षी त्याची शारीरिक ताकद आणि तग धरण्याची क्षमता प्रेरणा देणारी आहे. हा व्हिडीओ व्हायरल झाल्यापासून इंटरनेट यूजर्स त्यांचे कौतुक करत आहेत.

हा व्हिडिओ लेफ्टनंट कर्नल जेएस सोढी यांनी इंस्टाग्रामवर शेअर केला आहे. 46 सेकंदाच्या छोट्या क्लिपमध्ये, मेजर जनरल जोशी त्यांचा लष्करी गणवेश परिधान करून इतर जवानांसोबत जिममध्ये दिसत आहेत. यावेळी ते नॉन-स्टॉप पुलअप्स करताना दिसत आहेत. यावेळी इतर जवान पुलअप्सची संख्या मोजत आहेत. व्हिडिओच्या शेवटी, जिममधील प्रत्येकजण जोशी यांच्या शारीरिक तंदुरुस्तीच्या वचनबद्धतेचे कौतुक करताना दिसतो.

तंदुरुस्तीला सलाम!

व्हिडिओ शेअर करताना कर्नल सोधी यांनी कॅप्शनमध्ये लिहिलंय की, ‘भारतीय लष्कराचे मेजर जनरल प्रसन्न जोशी यांच्या शारीरिक तंदुरुस्तीला सलाम आणि आदर. ऑक्टोबर 2022 मध्ये स्टॅटिस्टा या जर्मन प्रकाशनाने भारतीय लष्कराला जगातील सर्वोत्कृष्ट लढाऊ दलाचा दर्जा दिला आहे यात आश्चर्य नाही. भारतीय सैन्याचा अभिमान आहे. जय हिंद.’

पुल-अप्स करण्याचे फायदे

पुल-अप्स करणे आरोग्यासाठी अनेक प्रकारे फायदेशीर आहे. यामुळे शारीरिक शक्ती आणि तग धरण्याची क्षमता वाढते. पुल-अप्स केल्याने खांदे आणि हात मजबूत होतात. वजन कमी करण्यासाठी देखील तुम्ही हा व्यायाम करू शकता. पुलअप्स केल्याने केवळ (बॉडी पॉश्चर) शरीर मुद्राच सुधारत नाही तर हाडेही मजबूत होतात. असे केल्याने मानसिक स्वास्थ्य चांगले राहते आणि झोपही चांगली लागते. पुलअप्स केल्याने पोटाचे स्नायू सक्रिय राहतात. हा व्यायाम कॅलरी बर्न करण्यासाठी खूप उपयुक्त ठरतो.

पुल-अप्स करण्याचा योग्य मार्ग

पुल-अप्स करण्यासाठी, सर्वप्रथम तुम्हाला सरळ उभे राहावे लागेल. जिममध्ये बसवलेल्या पुल-अप्स मशीनला हात वापरून लटकावे लागते. यानंतर, एक मजबूत पकड करा आणि शरीर वर उचला. या काळात तुमची छाती उंचावली पाहिजे. या दरम्यान खांदे कानांपासून दूर ठेवा. पुल-अप्स करताना, त्याचे काही सेट करावे लागतील.