IND-PAK Tension
जम्मू आणि काश्मीरमधील राजौरी येथे पाकिस्तानी गोळीबारात अतिरिक्त जिल्हा विकास आयुक्त राज कुमार थप्पा यांचा मृत्यू झाला. जम्मू आणि काश्मीरचे मुख्यमंत्री ओमर अब्दुल्ला यांनी 'एक्स' वर या घटनेची माहिती दिली.
राज कुमार थप्पा हे राजौरीतील सरकारी निवासस्थानी राहण्यास होते. गोळीबारात राजौरीचे अतिरिक्त उपायुक्त राजकुमार थापा आणि त्यांचे दोन कर्मचारी गंभीर जखमी झाले, असे अधिकाऱ्यांनी सांगितले. त्यांना शासकीय वैद्यकीय महाविद्यालयात दाखल करण्यात आले. मात्र येथे त्यांचा मृत्यू झाला. दोन्ही कर्मचाऱ्यांची प्रकृती गंभीर आहे.
मुख्यमंत्री ओमर अब्दुल्ला यांनी 'एक्स' पोस्टमध्ये म्हटलं आहे की, "राजौरीहून आलेली वेदनादायी बातमी. आपण जम्मू-काश्मीर प्रशासकीय सेवेतील एक समर्पित अधिकारी गमावला आहे. कालच ते उपमुख्यमंत्र्यांसोबत जिल्ह्याचा दौरा करत होते. मी अध्यक्षतेखाली झालेल्या ऑनलाइन बैठकीला उपस्थित होते. आज पाकिस्तानने राजौरी शहराला लक्ष्य करून केलेल्या गोळीबारात आमचे अतिरिक्त जिल्हा विकास आयुक्त राजकुमार थप्पा यांना अधिकाऱ्याच्या निवासस्थानी प्राण गमवावे लागले," असे मुख्यमंत्र्यांनी ट्विटरवरील पोस्टमध्ये म्हटले आहे. या भयानक जीवितहानीबद्दल दुःख व्यक्त करण्यासाठी माझ्याकडे शब्द नाहीत. त्याच्या आत्म्याला शांती लाभो.
