Delhi Murder Case: दिल्लीतील एका धक्कादायक हत्येचा आणि लैंगिक अत्याचार प्रकरणाचा अखेर उलगडा झाला असून, पोलिसांनी 23 वर्षीय राहुल मीणा या आरोपीला अटक केली आहे. एका आयआरएस अधिकाऱ्याच्या मुलीवर लैंगिक अत्याचार करून तिची हत्या केल्यानंतर आरोपी फरार झाला होता. मात्र चोरीचा मोबाईल, हॉटेलमधील वाय-फाय आणि इन्स्टाग्राम चॅट या तीन महत्त्वाच्या धाग्यांच्या आधारे दिल्ली पोलिसांनी त्याला अखेर पकडले आहे.
पोलिसांच्या माहितीनुसार, आरोपी राहुल मीणा हा यापूर्वी पीडित कुटुंबाकडे घरगुती मदतनीस म्हणून काम करत होता. बुधवारी त्याने दक्षिण-पूर्व दिल्लीतील घरात घुसून आयआरएस अधिकाऱ्याच्या मुलीवर अत्याचार केल्याचा आणि नंतर तिची हत्या केल्याचा आरोप आहे. या घटनेनंतर तो घरातून सुमारे अडीच लाख रुपये घेऊन फरार झाला होता.
घटना उघडकीस आल्यानंतर दिल्ली पोलिसांच्या अनेक पथकांनी तपास सुरू केला. घराबाहेरील आणि परिसरातील सीसीटीव्ही फुटेज तपासण्यात आले. तपासादरम्यान एक पथक राजस्थानमधील राजगड येथे पोहोचले. तेथे आरोपीच्या काकाला ताब्यात घेण्यात आले. चौकशीत त्याने राहुल मीणाने दिलेले तीन मोबाईल फोन विकल्याची माहिती दिली.
पोलिसांनी हे तीनही फोन एका दुकानदाराकडून जप्त केले. त्यामध्ये राहुलचा, त्याच्या भावाचा आणि मित्राचा फोन होता. पोलिसांच्या मते, राहुलचा फोन 10 हजार रुपयांना तर उर्वरित दोन फोन प्रत्येकी 3 हजार रुपयांना विकण्यात आले होते.
दरम्यान, राजस्थानमधील अलवर पोलिसांनी दिल्ली पोलिसांना माहिती दिली की राहुल मीणा मंगळवारी एका लग्नसमारंभासाठी अलवर येथे गेला होता. तेथे त्याने एका मित्राला कौटुंबिक कामासाठी जात असल्याचे सांगितले. मात्र नंतर तो मित्राच्या घरी परतला आणि तेथे मित्राच्या पत्नीवर लैंगिक अत्याचार केल्याचा आरोप आहे.
घरातून निघताना त्याने चार्जिंगला लावलेला ड्युअल सिम असलेला मोबाईलही चोरी केल्याचे समोर आले. या प्रकरणी अलवर पोलिसांनी बलात्काराचा गुन्हाही दाखल केला आहे.
तपासात पुढे समोर आले की, राहुल नवीन फोनच्या शोधात होता कारण त्याचे आधीचे फोन विकले गेले होते. त्याने चोरी केलेल्या मोबाईलमधील एका सिमची कॉलिंग सेवा बंद करून दुसऱ्या सिममध्ये इंटरनेट वापरत होता.
पोलिसांनी दोन्ही सिम कार्डचे इंटरनेट प्रोटोकॉल डिटेल रेकॉर्ड्स (IPDR) तपासले. त्यातून आरोपी एका वाय-फाय नेटवर्कचा वापर करत असल्याचे उघड झाले. तपासात समोर आले की तो गुरुग्राममध्ये राहणाऱ्या आपल्या चुलत भावाशी इन्स्टाग्राम मेसेंजरद्वारे सतत संपर्कात होता.
या माहितीच्या आधारे पोलिसांनी प्रथम त्या चुलत भावाला ताब्यात घेतले. तांत्रिक तपासाच्या मदतीने आरोपी दिल्लीतील द्वारका परिसरातील एका हॉटेलमध्ये लपल्याचे समोर आले. तो सकाळपासून त्या हॉटेलमध्ये राहत होता. पोलिसांनी तेथे छापा टाकून त्याला अटक केली.
तपासात आणखी एक धक्कादायक बाब समोर आली. राहुल मीणा हा राजस्थानमधील खासगी रुग्णालयाच्या अॅम्ब्युलन्स म्हणून वापरल्या जाणाऱ्या एका ईको व्हॅनमधून दिल्लीत आला होता. त्यासाठी त्याने 6 हजार रुपये भाडे ठरवले होते. मात्र घर शोधण्याचे कारण सांगून तो मध्येच उतरला आणि चालकाला पैसे न देता पळून गेला. त्यानंतर तो थेट पीडितेच्या घराकडे गेला होता, अशी माहिती पोलिसांनी दिली आहे.
