१ एप्रिलपासून ATM मधून पैसे काढण्याचे नियम बदलणार! तुमच्या खिशावर होणार थेट परिणाम

hdfc punjab national bank and bandhan bank announce atm rule changes from april 1 2026

पुढारी ऑनलाईन :

जर तुम्ही दैनंदिन खर्चासाठी ATM वापरत असाल, तर ही बातमी तुमच्यासाठी अत्यंत महत्त्वाची आहे. १ एप्रिल २०२६ पासून देशातील अनेक मोठ्या बँकांनी ATM आणि UPI संबंधित नियमांमध्ये मोठे बदल करण्याची घोषणा केली आहे. या बदलांचा थेट परिणाम तुमच्या खर्चावर होऊ शकतो.

नवीन आर्थिक वर्षाच्या सुरुवातीपासून म्हणजेच १ एप्रिल २०२६ पासून बँकिंग क्षेत्रात काही महत्त्वाचे बदल होणार आहेत. देशातील प्रमुख बँका HDFC बँक, पंजाब नॅशनल बँक (PNB) आणि बंधन बँक यांनी ATM पॉलिसी आणि व्यवहार शुल्कामध्ये बदल केले आहेत. या बदलांचा तुमच्या दैनंदिन व्यवहारांवर आणि कॅश काढण्याच्या मर्यादांवर थेट परिणाम होईल.

HDFC बँक

HDFC बँकेने मोठा बदल करत जाहीर केले आहे की आता ATM मधून UPI द्वारे कॅश काढणे हेही तुमच्या फ्री ट्रांजॅक्शन लिमिटमध्ये मोजले जाईल. म्हणजेच, जर तुम्ही ठरवलेल्या फ्री लिमिटपेक्षा जास्त व्यवहार केले, तर प्रत्येक अतिरिक्त व्यवहारावर ₹23 + कर आकारला जाईल. यापूर्वी UPI कॅश विथड्रॉल वेगळा मानला जात होता, पण आता तो सामान्य ATM व्यवहारासारखाच मानला जाईल.

पंजाब नॅशनल बँक (PNB)

PNB ने काही डेबिट कार्ड्ससाठी दररोज कॅश काढण्याची मर्यादा कमी केली आहे. काही कार्ड्ससाठी ही मर्यादा ₹1 लाखावरून ₹50,000 करण्यात आली आहे, तर प्रीमियम कार्ड्ससाठी ₹1.5 लाखावरून ₹75,000 करण्यात आली आहे. यामुळे मोठी रक्कम काढण्यासाठी तुम्हाला ATM ला अनेक वेळा जावे लागू शकते.

बंधन बँक

बंधन बँकेने देखील ATM वापराचे नियम बदलले आहेत. त्यांच्या ATM वर दर महिन्याला 5 फ्री आर्थिक व्यवहार मिळतील. इतर बँकांच्या ATM साठी मेट्रो शहरांमध्ये 3 फ्री व्यवहार आणि नॉन-मेट्रो शहरांमध्ये 5 फ्री व्यवहार मिळतील. त्यानंतर प्रत्येक आर्थिक व्यवहारावर ₹23 आणि नॉन-फायनान्शियल व्यवहारावर ₹10 शुल्क आकारले जाईल. जर खात्यात पुरेशी रक्कम नसल्यामुळे व्यवहार अयशस्वी झाला, तर ₹25 अतिरिक्त शुल्क द्यावे लागेल.

कोणत्या शहरांमध्ये हे नियम लागू?

मेट्रो शहरांमध्ये बेंगळुरू, चेन्नई, हैदराबाद, कोलकाता, मुंबई आणि नवी दिल्ली यांचा समावेश आहे. उर्वरित सर्व शहरे नॉन-मेट्रो श्रेणीत येतात.