नवी दिल्ली: भारतात सोन्याचे आकर्षण पूर्वापार चालत आले असून लग्नकार्य असो वा कोणताही शुभ प्रसंग, प्रत्येक ठिकाणी सोन्याची उपस्थिती आवर्जून दिसून येते. १९४७ मध्ये देश स्वतंत्र झाला तेव्हा अवघ्या ८८.६२ रुपये प्रति तोळा या दराने मिळणाऱ्या सोन्याने आज दीड लाख रुपयांचा टप्पा ओलांडला आहे. गेल्या ७९ वर्षांच्या कालावधीत सोन्याच्या दरात तब्बल १,७०० पटींहून अधिक प्रचंड वाढ नोंदवली गेली आहे.
'गुड रिटर्न्स' या वेबसाइटनुसार, सध्या २४ कॅरेट सोन्याचा दर सुमारे १५,५१३ ते १५,५३५ रुपये प्रति ग्रॅमच्या आसपास पोहोचला आहे. त्यामुळे एक तोळा म्हणजेच १० ग्रॅम सोन्यासाठी ग्राहकांना सुमारे १,५५,१३० ते १,५५,३५० रुपयांपर्यंत रक्कम मोजावी लागत आहे.
विशेष म्हणजे केवळ गेल्या सहा वर्षांचा विचार केल्यास, २०२० मधील ४८,६५१ रुपयांवरून सोन्याचा भाव २०२६ मध्ये थेट १,५५,२४० रुपयांवर गेला असून यामध्ये तिप्पट वाढ झाली आहे. यापूर्वी २००१ मध्ये सोन्याचा प्रति १० ग्रॅम दर ४,३०० रुपये होता, तर २०२५ मध्ये तो १,३३,१९५ रुपयांवर पोहोचला होता.
सोन्याकडे नेहमीच एक सर्वोत्तम संपत्ती आणि संकटकाळातील भरवशाचा साथीदार म्हणून पाहिले जाते. अडचणीच्या प्रसंगी सहज कामी येणारा पर्याय असल्याने गुंतवणूकदारांची याला पहिली पसंती असते. विशेषतः २००८-०९ च्या जागतिक आर्थिक मंदीनंतर सोन्याला सुरक्षित गुंतवणूक आणि आर्थिक पोर्टफोलिओचा समतोल राखणारा सक्षम पर्याय म्हणून जगभरात मोठी मान्यता मिळाली.
२००१ पासून सोन्याच्या किमतीत दरवर्षी सरासरी १५ टक्के इतका मजबूत परतावा मिळाला आहे. दरांमध्ये सातत्याने मोठी वाढ होत असतानाही भारतीयांचे सोन्यावरील प्रेम तसूभरही कमी झालेले नाही, परिणामी सोन्याच्या एकूण वापराच्या आणि खपाच्या बाबतीत भारत आजही जगात दुसऱ्या क्रमांकाचा देश ठरला आहे.
