पुढारी ऑनलाईन डेस्क : माजी परराष्ट्र मंत्री, कर्नाटकचे माजी मुख्यमंत्री आणि महाराष्ट्राचे माजी राज्यपाल सोमनहल्ली मल्लैय्या कृष्णा यांचे आज मंगळवारी दीर्घ आजाराने (SM Krishna passes away) निधन झाले. ते ९२ वर्षांचे होते. कृष्णा यांनी बंगळूर येथील त्यांच्या निवासस्थानी अखेरचा श्वास घेतला. उद्या मद्दूर येथे त्यांच्यावर अंत्यसंस्कार होणार आहेत.
कर्नाटकचे मुख्यमंत्री ते देशाचे परराष्ट्र मंत्री, महाराष्ट्राचे राज्यपाल आणि भारतीय राज्यकारणात १० वेगवेगळी पदे त्यांनी भूषविली होती. महाराष्ट्राच्या राज्यपाला पदाचा त्यांनी २००८ रोजी राजीनामा दिला होता. २००९ मधील तत्कालीन पंतप्रधान मनमोहन सिंग यांच्या मंत्रिमंडळात ते परराष्ट्र व्यवहार मंत्री होते. त्यांनी मार्च २०१७ मध्ये अधिकृतपणे भाजपमध्ये प्रवेश केला होता. कृष्णा यांनी त्यांच्या संपूर्ण राजकीय कारकिर्दीत अनेक महत्त्वाची पदे भूषवली. २००९ ते २०१२ पर्यंत ते केंद्रीय परराष्ट्र मंत्री होते. त्यांनी २००४ ते २००८ पर्यंत त्यांनी महाराष्ट्राचे राज्यपाल म्हणून काम पाहिले.
पंतप्रधान नरेंद्र मोदी यांनी एस. एम. कृष्णा यांच्या निधनाबद्दल दुःख व्यक्त केले आहे. "एस.एम. कृष्णा हे एक असामान्य नेते होते. इतरांचे जीवनमान सुधारण्यासाठी त्यांनी नेहमीच अथक परिश्रम घेतले. कर्नाटकच्या मुख्यमंत्रिपदाच्या कार्यकाळात विशेषत: पायाभूत सुविधांच्या विकासावर त्यांनी भर दिला. एस. एम. कृष्णाजी हे एक विपुल वाचक आणि विचारवंत होते.'' असे पीएम मोदी यांनी शोकसंदेशात म्हटले आहे.
गेल्या अनेक वर्षांमध्ये एस. एम. कृष्णा यांच्याशी मला संवाद साधण्याची अनेकवेळा संधी मिळाली. त्यांची ही आठवण नेहमी स्मरणात राहील. त्यांच्या जाण्याने मला खूप दु:ख झाले आहे. त्यांच्या कुटुंबियांप्रती मी संवेदना व्यक्त करतो. ओम शांती, असे पीएम मोदी यांनी पुढे म्हटले आहे.
एस.एम. कृष्णा यांच्या निधनाबद्दल कर्नाटकचे मुख्यमंत्री सिद्धरामय्या यांनीही दुःख व्यक्त केले आहे. ते म्हणाले, "राज्यात तसेच केंद्रीय मंत्री आणि मुख्यमंत्री म्हणून कृष्णा यांनी केलेले काम अतुलनीय आहे. आयटी-बीटी क्षेत्राच्या वाढीसाठी त्यांच्या योगदानाबद्दल कर्नाटक नेहमीच त्यांचे ऋणी राहील.''
माजी पंतप्रधान एचडी देवेगौडा यांनी एस. एम. कृष्णा यांच्या निधनाबद्दल दुःख व्यक्त करताना म्हटले आहे, "माझे मित्र आणि प्रदीर्घ काळापासून कर्नाटकातील माझे सहकारी एस. एम. कृष्णा यांच्या निधनाने मला दुःख झाले आहे."
कृष्णा यांनी १९६० च्या दशकात त्यांच्या राजकीय क्षेत्रातील कारकिर्दीला सुरुवात केली. १९६२ मध्ये त्यांनी पहिल्यांदा मद्दूर विधानसभा मतदारसंघातून अपक्ष म्हणून निवडणूक लढवली होती. ते काँग्रेस उमेदवाराचा पराभव करून विजयी झाले. त्यानंतर ते प्रजा सोशलिस्ट पार्टीत दाखल झाले. १९६८ मध्ये त्यांनी मंड्या लोकसभा मतदारसंघातील पोटनिवडणूक जिंकली. कृष्णा १९७१ मध्ये काँग्रेसमध्ये परतले. पुन्हा त्यांनी या मतदारसंघात विजय मिळवला. १९८५ मध्ये ते राज्याच्या राजकारणात परतले. ते १९९९ मध्ये कर्नाटकचे मुख्यमंत्री बनले आणि २००४ पर्यंत मुख्यमंत्री पदावर राहिले. कृष्णा यांनी जानेवारी २०२३ मध्ये सक्रिय राजकारणातून निवृत्ती घेतली होती.
