पंजाबचे माजी पोलीस महासंचालक मोहम्मद मुस्तफांच्या मुलाचा संशयास्पद मृत्यू
तक्रारदाराने दिली मुस्तफांविरोधात फिर्याद
मृत्यू पूर्वीचे व्हिडिओ सोशल मीडियावर व्हायरल झाल्याने पंजाबमध्ये खळबळ
Formar Punjab DGP booked for son death
चंडीगड : पंजाबचे माजी पोलीस महासंचालक (DGP) मोहम्मद मुस्तफा आणि त्यांची पत्नी तथा माजी मंत्री रजिया सुलताना यांच्यासह चौघांविरुद्ध त्यांच्या मुलाच्या मृत्यू प्रकरणी हरयाणा पोलिसांनी गुन्हा दाखल केला आहे. मुस्तफा यांच्या पत्नी रजिया सुलताना या पंजाबच्या माजी मंत्री आहेत. या प्रकरणी चौघांवर हत्या आणि गुन्हेगारी कट रचल्याच्या आरोपांखाली भारतीय न्याय संहितेच्या कलम १०३(१) आणि ६१ अन्वये एफआयआर (FIR) नोंदवण्यात आला असल्याची माहिती हरियाणा पोलिसांनी दिली.
मुस्तफा आणि माजी मंत्री सुलताना यांचा ३५ वर्षीय मुलगा अकील अख्तर याचा गुरुवारी (दिवस) हरयाणातील पंचकुला येथे मृत्यू झाला. शमशुद्दीन नावाच्या व्यक्तीने दाखल केलेल्या फिर्यादीनुसार, अख्तरचा मृत्यू ‘संशयास्पद परिस्थितीत’ झाला. दरम्यान, तक्रारदाराने तातडीने तपास करण्याची मागणी करत आरोप केला आहे की, अख्तरने समाजमाध्यमांवर एक व्हिडिओ पोस्ट केला होता, ज्यात त्याने कौटुंबिक बाबींशी संबंधित गंभीर आरोप केले होते आणि स्पष्टपणे आपल्या जीवाला धोका असल्याची भीती व्यक्त केली होती, असा आरोप तक्रारदाराने केला आहे.पंचकुला पोलीस उपायुक्त (DCP) सृष्टी गुप्ता यांच्या माहितीनुसार, १६ ऑक्टोबर रोजी पंचकुला येथील सेक्टर-४, एमडीसी (MDC) येथे राहणारा अख्तर त्याच्या घरी मृतावस्थेत आढळला. कुटुंबीयांनी पोलिसांना माहिती दिली आणि त्यांचे जबाब नोंदवले गेले. त्यांनी सांगितले की, सुरुवातीला कोणत्याही कटाचा संशय नव्हता आणि शवविच्छेदनानंतर मृतदेह अंतिम संस्कारासाठी कुटुंबाकडे सोपवण्यात आला.
पोलीस उपायुक्त सृष्टी गुप्ता यांनी सांगितले की, यानंतर काही समाजमाध्यमांवरील पोस्ट्स आणि व्हिडिओ समोर आले, जे कथितपणे अख्तरने त्याच्या मृत्यूपूर्वी बनवले होते. या व्हिडिओंमध्ये अख्तरने वैयक्तिक वाद आणि स्वतःच्या जीवाला धोका असल्याची शक्यता व्यक्त केली होती. १७ ऑक्टोबर रोजी पंजाबच्या मलेरकोटला येथील रहिवासी शमशुद्दीन यांच्याकडून एक तक्रार मिळाली. त्यात या घटनेत कट रचल्याचा आरोप करण्यात आला आहे.या तक्रारीच्या आणि समाजमाध्यमांवरील पोस्ट्समधील सामग्रीच्या आधारे, “पंचकुला येथील एमडीसी पोलीस ठाण्यात २० ऑक्टोबर रोजी भारतीय न्याय संहितेच्या कलम १०३ (१) आणि ६१ अन्वये मुस्तफा, सुलताना आणि अख्तरच्या बहिणीवर गुन्हा दाखल करण्यात आला आहे.या प्रकरणाच्या तपासासाठी सहायक पोलीस आयुक्त (ACP) दर्जाच्या अधिकाऱ्याच्या देखरेखीखाली विशेष तपास पथकाची (SIT) स्थापना करण्यात आली आहे.
पोलिसांनी निवेदनात म्हटले आहे, ‘‘ या प्रकरणाचा तपास कोणत्याही पूर्वग्रहाशिवाय केला जाईल. दोषी सुटणार नाही आणि कोणताही निर्दोष व्यक्ती बळी पडणार नाही. पंचकुला पोलीस या प्रकरणात पारदर्शकता आणि न्याय राखण्यासाठी वचनबद्ध आहेत.”
