Forex reserves June 2025 RBI foreign exchange gold reserves
मुंबई : भारतीय रिझर्व्ह बँकेच्या (RBI) ताज्या आकडेवारीनुसार, देशाचे परकीय चलन साठे (फॉरेक्स रिझर्व्ह्ज) 6 जून 2025 रोजी संपलेल्या आठवड्यात 5.17 अब्ज डॉलरनी वाढून 696.656 अब्ज डॉलरवर पोहोचले आहेत. ही रक्कम सप्टेंबर 2024 मध्ये नोंदवलेल्या सर्वकालीन उच्चांक 704.89 अब्ज डॉलरच्या केवळ 1.2 टक्के अंतरावर आहे.
त्याआधीच्या आठवड्यात, म्हणजे 30 मे रोजी संपलेल्या आठवड्यात, फॉरेक्स रिझर्व्ह्जमध्ये 1.23 अब्ज डॉलरची घट झाली होती.
फॉरेक्स रिझर्व्ह्जचा प्रमुख घटक असलेल्या परकीय चलन मालमत्तेमध्ये (Foreign Currency Assets - FCA) $3.472 अब्जने वाढ झाली असून ती 587.687 अब्ज डॉलर झाली आहे. ही वाढ आंतरराष्ट्रीय चलनांच्या मूल्यात होणाऱ्या बदलांमुळे झाली आहे.
6 जूनपर्यंतच्या आठवड्यात, RBI च्या ताफ्यातील सोने साठा 1.583 अब्ज डॉलरने वाढून 85.888 अब्ज डॉलरवर पोहोचला आहे. 2021 पासून RBI च्या एकूण फॉरेक्स साठ्यातील सोन्याचा वाटा जवळपास दुप्पट झाला आहे. यामागचे प्रमुख कारण म्हणजे जागतिक मध्यवर्ती बँकांकडून "सुरक्षित गुंतवणूक" म्हणून सोन्यात वाढती खरेदी.
RBI चे गव्हर्नर संजय मल्होत्रा यांनी नुकतेच सांगितले की, सध्याचा परकीय चलन साठा भारताच्या जवळपास 11 महिन्यांच्या आयातीसाठी पुरेसा असून देशाच्या सुमारे 96 टक्के परकीय कर्जासाठीही हा साठा सक्षम आहे.
2022: फॉरेक्स साठ्यात 71 अब्ज डॉलरची घट
2023: साठ्यात 58 अब्ज डॉलरची वाढ
2024: साठ्यात सुमारे 20 अब्ज डॉलरची वाढ
फॉरेक्स साठा हा देशाच्या आर्थिक स्थैर्यासाठी अत्यंत महत्त्वाचे मानले जातात. यामध्ये US डॉलर हे मुख्य घटक असून यामध्ये युरो, जपानी येन आणि ब्रिटिश पाउंड सारख्या इतर प्रमुख चलनांचाही समावेश असतो.
रुपयामध्ये अचानक मोठी घसरण होऊ नये म्हणून RBI वेळोवेळी डॉलर खरेदी किंवा विक्री करत चलनबदल बाजारात हस्तक्षेप करते.
