ECI News
केंद्रीय निवडणूक आयोगाने केंद्रस्तरीय अधिकाऱ्यांच्या (BLO) मानधनात दुपटीने वाढ केली आहे. २०१५ पासून बीएलओंना ६ हजार रुपये मानधन मिळत होते. आता ते दुपटीने वाढवून १२ हजार रुपये करण्यात आले आहे. तर बीएलओ पर्यवेक्षकांचे मानधन १२ हजारांवरुन १८ हजार रुपयांपर्यंत वाढवले आहे. तसेच पहिल्यांदाच निवडणूक नोंदणी अधिकारी (ERO) आणि सहाय्यक निवडणूक नोंदणी अधिकारी (AERO) यांनाही मानधन देण्याचा निर्णय घेतला आहे, असे केंद्रीय निवडणूक आयोगाने जारी केलेल्या प्रसिद्धी पत्रकात म्हटले आहे.
निवडणूक नोंदणी अधिकाऱ्यांना ३० हजार रुपये आणि सहाय्यक निवडणूक नोंदणी अधिकाऱ्यांना २५ हजार रुपये मानधन दिले जाणार आहे.
मतदार यादीच्या पुनरीक्षणासाठी बीएलओंना मिळणारा भत्ता १ हजार रुपयांवरून आता २००० रुपये करण्यात आला आहे.
"पारदर्शक मतदार याद्या ह्या लोकशाहीचा पाया आहेत. निवडणूक नोंदणी अधिकारी, सहाय्यक निवडणूक नोंदणी अधिकारी, बीएलओ पर्यवेक्षक आणि बीएलओ यांचा समावेश असलेली निवडणूक यंत्रणा मतदार याद्या खूप मेहनतीने तयार करते. ते निष्पक्ष आणि पारदर्शक मतदार याद्या तयार करण्यात महत्त्वाची भूमिका बजावतात," असे निवडणूक आयोगाने मानधन वाढीची घोषणा करताना जारी केलेल्या एका निवेदनात म्हटले आहे.
"यामुळे निवडणूक आयोगाने बीएलओंचे वार्षिक मानधन दुपटीने वाढवण्याचा निर्णय घेतला आहे. तसेच मतदार यादी तयार करणाऱ्या आणि त्यात सुधारणा करणाऱ्या बीएलओ पर्यवेक्षकांच्या मानधनातदेखील वाढ करण्यात आली आहे. याआधी त्यांचे मानधन २०१५ मध्ये वाढवण्यात आले होते. तसेच, आता ERO आणि AERO यांना पहिल्यांदाच मानधन देण्याचा निर्णय घेतला आहे," असे त्यात नमूद केले आहे.
