पुढारी ऑनलाईन डेस्क : तब्बल बारा तासांच्या वादळी चर्चेनंतर लोकसभेत बुधवारी वक्फ सुधारणा विधेयकाला बहुमताने मंजुरी देण्यात आली. विधेयकाच्या समर्थनार्थ 288 सदस्यांनी मतदान केले, तर 232 सदस्यांनी विरोध केला. तसेच, 23 जणांनी मतदानात भाग घेतला नाही. विधेयकावरील चर्चेदरम्यान सत्ताधारी आणि विरोधी पक्षांनी आपली ताकद दाखवून दिली. आज विधेयक राज्यसभेमध्ये मांडण्यात येणार आहे. दरम्यान, तामिळनाडूचे मुख्यमंत्री आणि द्रमुकचे अध्यक्ष एम के स्टॅलिन यांनी या विधेयकाला तीव्र विरोध केला आहे. आपला पक्ष या विधेयकाविरुद्ध सर्वोच्च न्यायालयात दाद मागणार असल्याचे त्यांनी विधानसभेत बोलताना सांगितले.
वक्फ विधेयक लोकसभेत मंजूर झाले. याच्या निषेधार्थ आज स्टॅलिन विधानसभेत हाताला काळी पट्टी बांधून आले होते. सभागृहात बोलताना ते म्हणाले की, देशातील बहुसंख्य राजकीय पक्षांनी या विधेयकाला विरोध केला होता. मात्र केंद्र सरकारने हा विरोध जुमानला नाही. काही मित्रपक्षांच्या इशाऱ्यावर पहाटे २ वाजता ही दुरुस्ती स्वीकारणे हे संविधानाच्या रचनेवर हल्ला आहे. ही धार्मिक सलोखा बिघडवणारी कृती आहे. हे अधोरेखित करण्यासाठी, आम्ही आजच्या विधानसभेच्या कामकाजात काळी पट्टी बांधून सहभागी होत आहोत. "
