अहमदाबादमध्ये झालेल्या भीषण विमान अपघातानंतर नागरी विमान वाहतूक महासंचालनालयाने (डीजीसीए) विमान वाहतुकीच्या सुरक्षेबाबत कारवाई करण्यास सुरुवात केली आहे. 'डीजीसीए'ने एअर इंडियाला विभागीय उपाध्यक्षांसह तीन अधिकाऱ्यांना क्रू शेड्यूलिंग आणि रोस्टरिंगशी संबंधित सर्व भूमिका आणि जबाबदाऱ्यांमधून काढून टाकण्याचे आदेश दिले आहेत. २० जून रोजीच्या आपल्या आदेशात एअर इंडियाला या अधिकाऱ्यांविरुद्ध तात्काळ शिस्तभंगाची कारवाई सुरू करण्यास सांगितले आहे. तसेच या प्रकरणी एअर इंडियाने १० दिवसांमध्ये अहवाल सादर करावा, असेही स्पष्ट केले आहे.
'डीजीसीए'ने आपल्या आदेशात म्हटले आहे की, परवाना, आराम आणि नाविन्यपूर्ण आवश्यकतांमध्ये त्रुटी असूनही, एअर इंडियाने फ्लाइट क्रूच्या वेळापत्रक आणि ऑपरेशनमध्ये वारंवार निष्काळजीपणा दाखवला. एआरएमएस ते सीएई फ्लाइट आणि क्रू मॅनेजमेंट सिस्टममध्ये बदल झाल्यानंतर पुनरावलोकनादरम्यान ही निष्काळजीपणा आढळून आला. एआरएमएस (एअर रूट मॅनेजमेंट सिस्टम) हे एक सॉफ्टवेअर प्लॅटफॉर्म आहे. याचा वापर एअरलाइन विविध ऑपरेशनल आणि मॅनेजमेंट फंक्शन्ससाठी वापरते. यामध्ये क्रू रोस्टरिंग आणि फ्लाइट प्लॅनिंग इत्यादींचा समावेश आहे.
डीजीसीएच्या आदेशात म्हटले आहे की, चाैकशीत क्रू शेड्युलिंग, अनुपालन देखरेख आणि अंतर्गत जबाबदारीमधील त्रुटी दर्शवितात. निष्काळजीपणा असूनही जबाबदार असलेल्या प्रमुख अधिकाऱ्यांविरुद्ध कठोर शिस्तभंगाची कारवाई करण्यात आली नाही. अधिकारी अनधिकृत क्रू पेअरिंग, अनिवार्य परवाना, वेळापत्रक प्रोटोकॉलचे उल्लंघन, तपासणीतील हलगर्जीपणा यासारख्या गंभीर चुकांमध्ये सहभागी आहेत, असे स्पष्ट करत भविष्यात क्रू शेड्युलिंगचे उल्लंघन झाल्यास परवाना निलंबन आणि ऑपरेशनल बंदीसह कठोर कारवाई केली जाईल, असा इशारा 'डीजीसीए'ने एअर इंडियाला इशारा दिला आहे.
डीजीसीए (नागरी विमान वाहतूक महासंचालनालय) ने एअर इंडियाच्या जबाबदार व्यवस्थापकाला कारणे दाखवा नोटीस बजावली आहे. नोटीसमध्ये म्हटले आहे की, एअर इंडियाच्या अकाउंटेबल मॅनेजरने १६ मे २०२५ आणि १७ मे २०२५ रोजी बंगळुरूहून लंडनला (AL133) दोन उड्डाणे केली. दोन्ही उड्डाणांनी निर्धारित १० तासांची उड्डाण वेळ मर्यादा ओलांडली. या प्रकरणी डीजीसीएने अधिकाऱ्याला सात दिवसांच्या आत उत्तर देण्यास सांगितले आहे. तसेच या प्रकरणी योग्य अंमलबजावणी कारवाई का सुरू करू नये?, असा सवालही केला आहे.
डीजीसीएच्या आदेशानंतर, एअर इंडियाने म्हटले की, आम्ही डीजीसीएचे निर्देश स्वीकारले आहेत आणि आदेशाची अंमलबजावणी केली आहे. कंपनीचे मुख्य कार्यकारी अधिकारी इंटिग्रेटेड ऑपरेशन्स कंट्रोल सेंटर (आयओसीसी) चे निरीक्षण करतील. सुरक्षा प्रोटोकॉल आणि मानक पद्धतींचे पूर्णपणे पालन केले जाईल याची खात्री करण्यासाठी एअर इंडिया वचनबद्ध आहे. १२ जून २०२५ रोजी एअर इंडियाचे लंडनला जाणारे विमान एआय-१७१, एकूण २४२ प्रवासी आणि क्रू मेंबर्सना घेऊन, अहमदाबादमधील मेडिकल कॉलेज कॅम्पसमध्ये कोसळले. या भीषण दुर्घटनेत २७० जणांच्या मृत्यूनंतर एका आठवड्यानंतर, डीएनए मॅचिंगद्वारे २१५ मृतांची ओळख पटवण्यात आली आहे. १९८ मृतदेह त्यांच्या कुटुंबियांना सुपूर्द करण्यात आले आहेत.
