Crime News
नवी दिल्ली: दिल्लीतील सीमापुरी परिसरात शुक्रवारी एका १५ वर्षीय मुलीवर झालेल्या प्राणघातक हल्ल्यानंतर, शनिवारी सकाळी तिचा उपचारादरम्यान मृत्यू झाला. धक्कादायक बाब म्हणजे या हल्ल्यातील २४ वर्षीय मुख्य आरोपीचाही शुक्रवारी संध्याकाळी त्याच्या राहत्या घरी झालेल्या गॅस सिलिंडर स्फोटात मृत्यू झाला आहे.
मृत्यू झालेली मुलगी नुकतीच दहावीची परीक्षा देऊन निकालाची वाट पाहत होती. शुक्रवारी संध्याकाळी 'पाच मिनिटांत येते' असे सांगून ती जवळच्या दुकानात औषधे आणण्यासाठी घराबाहेर पडली होती. मात्र, तिथेच तिच्यावर चाकूने सपासप वार करण्यात आले. रुग्णालयात उपचार सुरू असताना शनिवारी सकाळी ६ च्या सुमारास तिचा मृत्यू झाला.
मुलगी रक्ताच्या थारोळ्यात पडलेली असताना सुमारे २० मिनिटे तिला कोणतीही मदत मिळाली नाही, असा आरोप तिच्या काकांनी केला आहे. तिच्या शरीरावर अनेक जखमा होत्या. "ती ५ मिनिटांत येते म्हणाली होती, पण अद्याप परतलीच नाही," असे सांगत तिच्या आजीने टाहो फोडला.
मुलीवर हल्ला केल्यानंतर काही तासांतच, दोन किलोमीटर अंतरावर राहणाऱ्या २४ वर्षीय आरोपीचा त्याच्या घरी गॅस सिलिंडरच्या स्फोटात मृत्यू झाला. नातेवाईकांच्या मते, त्याने आत्महत्या करण्याच्या उद्देशाने स्वतःच हा स्फोट घडवून आणला. हा तरुण एका ई-कॉमर्स कंपनीत डिलिव्हरी एक्झिक्युटिव्ह म्हणून काम करत होता.
सुरुवातीला दोन्ही कुटुंबांनी एकमेकांना ओळखत नसल्याचा दावा केला होता. मात्र, वरिष्ठ पोलीस अधिकाऱ्यांनी दिलेल्या माहितीनुसार, मुलगी आणि आरोपी एकमेकांच्या ओळखीचे होते आणि ही बाब दोन्ही कुटुंबांना माहित होती. हल्ल्यापूर्वी त्यांच्यात फोनवर संभाषण झाले होते. दोन वर्षांपूर्वी आरोपीची मावशी मुलीच्या घराशेजारी राहत होती, तेव्हापासून त्यांची ओळख होती.
