पुढारी ऑनलाईन डेस्क : उत्तर प्रदेशचे मुख्यमंत्री योगी आदित्यनाथ यांना जीवे मारण्याची धमकी देण्यात आल्याचे समोर आले आहे. याबाबत मुंबई पोलिसांना धमकीचा मेसेज मिळाला आहे. या प्रकारानंतर मुंबई पोलीस सक्रिय झाले असून मेसेज पाठवणाऱ्या व्यक्तीचा शोध घेत आहेत.
मुंबईच्या वाहतूक नियंत्रण कक्षाला एका अनोळखी मोबाईल नंबरवरून मेसेज संदेश आला आहे. त्यात म्हटले आहे की, ‘योगी आदित्यनाथ यांनी 10 दिवसांत राजीनामा द्यावा. नाही तर आम्ही त्यांना बाबा सिद्दीकी यांच्याप्रमाणे मारून टाकू’. शनिवारी (2 नोव्हेंबर) सायंकाळी हा मेसेज मिळाला. त्यानंतर सुरक्षा यंत्रणा सतर्क झाली आहे. या प्रकरणी मुंबई पोलिसांनी शोध सुरू केला आहे. हा नंबर कुणाच्या नावावर रजिस्टर आहे, मेसेज कुणी केला? मेसेज करणारे मुंबईतीलच आहेत की बाहेरचे आहेत? मेसेज करणाऱ्या गुन्हेगारी टोळीशी संबंधित आहेत का? की कुणी खोडसाळपणा केलाय? याची माहिती पोलीस घेत असल्याचे सूत्रांनी सांगितले. तसेच मेसेज करणाऱ्या व्यक्तीचाही शोध घेतला जात असल्याचे सांगण्यात आले.
2024 मध्ये उत्तर प्रदेशचे मुख्यमंत्री योगी आदित्यनाथ यांना अनेक वेळा जीवे मारण्याच्या धमक्या आल्या होत्या. यूपी पोलिसांनी वेगवेगळ्या ठिकाणांहून धमक्या देणाऱ्यांना अटक केली. कधी फेसबुक-एक्सच्या माध्यमातून तर कधी पोलिसांना मेसेजद्वारे या धमक्या आल्या आहेत. कधी फेसबुक-एक्सच्या माध्यमातून तर कधी पोलिसांना मेसेजद्वारे या धमक्या आल्या आहेत. उत्तर प्रदेश, मुंबई आणि बिहारमधून अनेकांना अटक करण्यात आली आहे, ज्यांनी सोशल मीडियाच्या माध्यमातून मुख्यमंत्री योगी आदित्यनाथ यांना जीवे मारण्याची धमकी दिली होती.
