नवी दिल्ली : वृत्तसंस्था
भारत आणि रशियाच्या संयुक्त उपक्रमातून विकसित होणाऱ्या प्रसिद्ध 'ब्राह्मोस' सुपरसॉनिक क्रूझ क्षेपणास्त्राची न अधिक अत्याधुनिक आवृत्ती 'ब्राह्मोस-एनजी' लवकरच प्रत्यक्षात येत आहे. ब्राह्मोस एरोस्पेसचे मुख्य कार्यकारी अधिकारी आणि व्यवस्थापकीय संचालक जयतीर्थ जोशी यांनी दिलेल्या माहितीनुसार, या प्रगत क्षेपणास्त्राचा पहिला प्रोटोटाइप २०२७ किंवा २०२८ पर्यंत तयार होण्याची अपेक्षा आहे.
सध्याच्या ब्राह्मोसच्या तुलनेत ब्राह्मोस-एनजी आकाराने अधिक लहान आणि वजनाने अत्यंत हलके असेल. याचे वजन सुमारे १.२ ते १.५ टन आणि लांबी ६ मीटरपेक्षा कमी असेल. हलक्या वजनामुळे आणि आधुनिक कंपोझिट मटेरियलच्या वापरामुळे हे क्षेपणास्त्र सुखोई-३० एमकेआय सोबतच भारताच्या हलक्या 'एलसीए तेजस' लढाऊ विमानावरही सहज तैनात करता येईल. हे क्षेपणास्त्र आवाजाच्या वेगापेक्षा सुमारे साडेतीन पट जास्त (मॅक ३.५) वेगाने लक्ष्यभेद करण्यास सक्षम असेल. लखनऊ येथील नवीन कारखान्यातून २०२७-२८ पर्यंत याचे प्रत्यक्ष उत्पादन सुरू करण्याचे उद्दिष्ट आहे.
भविष्यातील धोरणात्मक गरजा लक्षात घेऊन ब्राह्मोस एरोस्पेस तब्बल १,५०० किमी पल्ल्याच्या क्षेपणास्त्राच्या संकल्पनेवरही काम करत आहे. यामुळे भारतीय सैन्यदलांना सीमेपलीकडे खोलवर मारा करण्याची ताकद मिळेल.
