Lok Sabha Election 2024 : लोकसभेच्या सहाव्या टप्प्याचे मतदान सुरू

पुढारी ऑनलाईन डेस्क : लोकसभेच्या सहाव्या टप्प्यांतर्गत आज (२५ मे) ७ राज्ये आणि १ केंद्रशासित प्रदेशातील (जम्मू-काश्मीर) ५८ जागांवर मतदान सुरू झाले आहे. जम्मू-काश्मीरमधील अनंतनाग-राजौरी मतदारसंघात तिसऱ्या टप्प्यात मतदान होणार होते; मात्र ते पुढे ढकलण्यात आल्याने सहाव्या टप्प्यात येथे मतदान होत आहे. मेहबुबा मुफ्ती येथे उमेदवार आहेत.

२०१९ च्या निवडणुकीत भाजपने या ५८ जागांपैकी सर्वाधिक ४० जागा जिंकल्या होत्या. बसपने ४, बिजदने ४, समाजवादी पक्षाने १, जदयुने ३, तृणमूलने ३, लोजपने १, एजेएसयूने १ जागा जिंकली होती. या मतदारसंघांत काँग्रेस आणि 'आप'ला खातेही उघडता आले नव्हते.

आकडे बोलतात

• ६व्या टप्प्यात ८८९ उमेदवार निवडणूक रिंगणात आहेत.
• ७९७ पुरुष आणि ९२ महिला उमेदवार आहेत. १,२४१ कोटी रुपयांच्या संपत्तीसह हरियाणातील कुरुक्षेत्र मतदारसंघाचे भाजप उमेदवार नवीन जिंदाल या टप्प्यातील सर्वांत श्रीमंत उमेदवार आहेत.
• ५४३ मतदारसंघांपैकी पाचव्या टप्प्यापर्यंत
• ४२९ जागांवर मतदान झाले आहे.
• २५ मेपर्यंत एकूण ४८७ जागांवर मतदान पूर्ण होईल. ७व्या आणि शेवटच्या टप्प्यात ५६ जागांवर मतदान होईल.
• १८३ उमेदवारांवर फौजदारी गुन्हे दाखल आहेत.
• ३९ टक्के उमेदवार कोट्यधीश आहेत. त्यात भाजपचे सर्वाधिक ४८ उमेदवार.

कुठे, किती उमेदवार?

• बिहार :८
• हरियाणा : १०
• झारखंड : ४
• ओडिशा : ६
• उत्तर प्रदेश : १४
• पश्चिम बंगाल : ८
• दिल्ली : ७
• जम्मू काश्मीर : १

वैशिष्ट्ये…

• नवी दिल्लीतून दिवंगत नेत्या आणि माजी परराष्ट्र व्यवहारमंत्री सुषमा स्वराज यांच्या कन्या बान्सुरी या पहिल्यांदाच निवडणूक लढवत आहेत. आम आदमी पक्षाचे तीन वेळा आमदार राहिलेले सोमनाथ भारती यांच्याशी त्यांचा सामना आहे.
• उत्तर दिल्लीतून भाजपचे गत दोनवेळचे खासदार मनोज तिवारी यांचा सामना काँग्रेसचे कन्हैया कुमार यांच्याशी आहे. अभिनेते राज बब्बर हरियाणातील गुरुग्राममधून काँग्रेसचे उमेदवार आहेत.
• सुलतानपुरातून भाजपतर्फे मनेका गांधी उमेदवार आहेत. ओडिशातील पुरीची जागा बिजू जनता दलाचा बालेकिल्ला मानली जाते. भाजपचे संबित पात्रा बिजदच्या अरूप पटनाईक (माजी वरिष्ठ पोलीस अधिकारी) यांच्याशी लढत आहेत.