बाळाचे लिंग तपासण्यासाठी गर्भवती पत्नीचे पोट फाडले, नराधम पतीस जन्मठेप

पुढारी ऑनलाईन डेस्क : उत्तर प्रदेशमधील बदायूं येथे एक धक्कादायक घटना घडली आहे. मुलगाच होण्याच्या हव्यासापोटी एका पतीने क्रूरतेच्या सर्व मर्यादा ओलांडल्या. आपली आठ महिन्यांची गर्भवती पत्नी पुन्हा मुलीलाच जन्म देईल या भीतीने नराधम पतीने पत्नीचे पोट फाडल्याचे समोर आले आहे. पीडित महिला पुढच्याच महिन्यात बाळाला जन्म देणार होती. पण त्याआधीच पतीने निर्घृण कृत्य केले. या घटनेत गर्भाला जीव गमवावा लागला. या घटनेच्या तीन वर्षांनंतर कोर्टाने या खटल्याचा निकाल दिला असून आरोपी पतीला दोषी ठरवत जन्मठेपेसह 50 हजार रुपयांचा दंड ठोठावला आहे.

काय प्रकरण आहे?

हे प्रकरण बदाऊनच्या सिव्हिल लाइन्स भागातील आहे. 46 वर्षीय पन्नालाल याची पत्नी अनिता देवी गर्भवती होती. अनिताच्या गरोदरपणाला 8 महिने उलटून गेले होते. तेव्हा एका ज्योतिषाने पन्नालालला सांगितले की त्याच्या घरी पुन्हा मुलगीच जन्माला येईल. हे ऐकून पन्नालालचा अस्वस्थ झाला आणि घरी येताच त्याने विळ्याने पत्नीचे पोट फाडले आणि गर्भाचे लिंग जाणून घेण्याचा प्रयत्न सुरू केला. ही घटना 19 सप्टेंबर 2020 रोजी संध्याकाळी घडली.

या घटनेनंतर अनिताला सफदरगंज रुग्णालयात दाखल करण्यात आले. अनिताची प्रकृती गंभीर होती. अशा परिस्थितीत डॉक्टरांनी अनिताचा जीव कसातरी वाचवला, मात्र गर्भाचा जगात येण्याआधीच मृत्यू झाला. या घटनेनंतर पोलिसांनी पन्नालालला तात्काळ ताब्यात घेतले.

अनिताचा भाऊ रवी सिंहने दिलेल्या माहितीनुसार, अनिताचा विवाह 25 वर्षांपूर्वी पन्नालालसोबत झाला होता. लग्नानंतर अनिताने 5 मुलींना जन्म दिला पण पन्नालाल यांना मुलगा हवा होता. अशा परिस्थितीत जेव्हा अनिता सहाव्यांदा गरोदर राहिली तेव्हा पन्नालालने गावातील एका ज्योतिषाला मुलाबद्दल विचारले. यावर ज्योतिषाने पुन्हा मुलगी होईल असे भाकीत केले. यानंतर पन्नालालने अनिताला गर्भपात करण्याचा आग्रह धरला पण अनिताने नकार दिला. त्यामुळे नराधम पन्नालाने अनिताचे पोट फाडले.

आरोपीला जन्मठेपेची शिक्षा

पन्नालाल यांच्यावर आयपीसी कलम 307 (हत्येचा प्रयत्न) आणि 313 (महिलेच्या संमतीशिवाय गर्भपात) अंतर्गत गुन्हा दाखल करण्यात आला होता. या खटल्याची सुनावणी करताना न्यायाधीश सौरभ सक्सेना यांनी पन्नालालला जन्मठेपेची शिक्षा सुनावली असून आता पन्नालाल संपूर्ण आयुष्य तुरुंगात घालवणार आहेत.