भाजपचा 'MP फॉर्म्युला' ठरला लक्षवेधी!,जाणून घ्‍या तीन राज्‍यांतील यशाचे सूत्र
पुढारी ऑनलाईन डेस्‍क : मध्य प्रदेश, राजस्थान आणि छत्तीसगड विधानसभा निवडणुकीत भारतीय जनता पक्षाची सत्तास्‍थापनेकडे वाटचाल सुरु झाली आहे. मतमोजणीत या तिन्‍ही राज्यांमध्ये पक्षाने निर्णायक बहुमतांकडे आपली घोडदौड सुरु ठेवली आहे. भाजपच्या या लक्षवेधी यशामागे ‘MP फॉर्म्युला’ यशस्‍वी ठरल्‍याचे मानले जात आहे. ( BJP MP Plan in Assembly Election)जाणून घेवूया भापच्‍या यशाच्‍या सूत्राविषयी…
चार राज्यांच्या विधानसभा निवडणुकीची मतमोजणी सुरू आहे. आतापर्यंतच्या मतमोजणीनुसार, मध्य प्रदेश, राजस्थान आणि छत्तीसगडमध्ये भारतीय जनता पक्ष (भाजप) आघाडीवर आहे, तर तेलंगणामध्ये काँग्रेस आघाडीवर आहे. मध्य प्रदेशच्या २३० जागांपैकी भाजप तब्‍बल १६१ जागांवर आघाडीवर आहे. राज्यात सत्तेच्या दिशेने वाटचाल स्‍पष्‍ट झाली आहे. राजस्थानमध्येही भाजप सत्ताधारी काँग्रेसपेक्षा खूप पुढे आहे. गेल्या तीन दशकांपासून येथील जनता प्रत्येक निवडणुकीत सरकार बदलत आहे. भाजप 55 पेक्षा जास्त जागांवर तर काँग्रेस 32 पेक्षा जास्त जागांवर आघाडीवर आहे. यासोबतच काँग्रेसशासित छत्तीसगडमध्येही भाजप ५५ जागांवर तर काँग्रेस ३२ जागांवर आघाडीवर आहे. यामुळे आता तिन्‍ही राज्यात भाजप आपले सरकार स्‍थापन करेल, असे चित्र आहे.
BJP MP Plan : तीन राज्यांमध्ये भाजपने राबवला ‘MP फॉर्म्युला’
यंदाच्‍या विधानसभा निवडणुकीत भाजपने खासदार फॉर्म्युला वापरला. म्हणजे या राज्यांमध्ये विधानसभा निवडणुकीत भाजपने अनेक खासदारांना उभे केले होते. पक्षाने मध्य प्रदेश आणि राजस्थानमध्ये प्रत्येकी सात आणि छत्तीसगडमध्ये चार विद्यमान खासदारांना तिकीट दिले होते. खासदारांना मैदानात उतरवून अन्‍य विधानसभा मतदारसंघांवरही प्रभाव टाकण्‍यात पक्षाला लक्षणीय यश लाभले आहे.
मध्य प्रदेशमध्‍ये भाजपने राजकीय ताकद लावली पणाला
२३० सदस्यांच्या मध्य प्रदेश विधानसभा निवडणुकीत भाजपची काँग्रेसशी थेट लढत होती.भाजपने संपूर्ण राजकीय ताकद पणाला लावली होती. पक्षाच्‍या सात खासदारांना विधानसभेची निवडणूक लढवली. खासदार नरेंद्र सिंह तोमर दिमानी विधानसभा मतदारसंघातून निवडणूक लढवली होती. सध्या येथे काँग्रेसचे आमदार होते. रवींद्र तोमर 2018 च्या निवडणुकीत येथून विजयी झाले होते. यावेळीही काँग्रेसने रवींद्र यांच्यावर बाजी मारली होती. केंद्रीय मंत्री प्रल्हाद पटेल महाकोशलच्या नरसिंगपूर मतदारसंघातून निवडणूक लढवत होते. सध्या ही जागा भाजपकडे आहे. 2018 च्या निवडणुकीत प्रल्हाद पटेल यांचे बंधू जलम यांनी येथून निवडणूक जिंकली होती. मात्र यावेळी त्यांच्या जागी त्यांचे मोठे बंधू प्रल्हाद पटेल यांना तिकीट देण्यात आले. सध्या प्रल्हाद 13 हजार मतांनी आघाडीवर आहेत.
केंद्रीय मंत्री फग्गन सिंग कुलस्ते हे मध्य प्रदेशमधील मांडला मतदारसंघातून निवडणूक लढवली. काँग्रेसने विद्यमान आमदाराचे तिकीट रद्द करून चैन सिंग यांना तिकीट दिले होते. सध्या ही जागा काँग्रेसकडे असून, ती जिंकण्यासाठी कुलस्ते यांच्यावर दबाव होता. आतापर्यंतच्या ट्रेंडनुसार कुलस्ते तीन हजार मतांनी मागे आहेत.
खासदार उदयराव प्रताप सिंह नरसिंहपूरच्या गादरवाडा मतदारसंघातून उमेदवार होते. हे आसनही महाकौशालमध्ये येते. उदयराव यांच्यासमोर काँग्रेसच्या सुनीता पटेल होत्या. ही जागा अजूनही काँग्रेसकडे होती. सध्याच्या ट्रेंडनुसार उदयराव 30 हजार मतांनी आघाडीवर आहेत.
खासदार रीती पाठक या सिधी मतदारसंघातून निवडणूक लढवत होत्या. येथे भाजपचे बंडखोर केदार शुक्ला यांनी त्यांच्या अडचणी वाढवल्या होत्या. काँग्रेसने येथून ज्ञानसिंह यांना उमेदवारी दिली होती. ही जागा सध्या भाजपकडे असून आतापर्यंतच्या ट्रेंडनुसार ती अबाधित असल्याचे दिसते. रिती येथे ८३४१ मतांनी आघाडीवर आहेत.
खासदार गणेश सिंह हे सतना मतदारसंघातून निवडूक लढवली. काँग्रेसच्या सिद्धार्थ कुशवाह यांच्याशी त्‍यांचा मुकाबला होता. गणेश सिंह सध्या 1052 मतांनी आघाडीवर आहेत.खासदार राकेश सिंह जबलपूर पश्चिम मतदारसंघातून निवडणूक रिंगणात उतरले होते. निवडणूक लढवत होते. त्यांच्यासमोर काँग्रेसचे माजी मंत्री तरुण भानोत यांचे आव्‍हान होते. मागील निवडणुकीत या मतदारसंघात काँग्रेसने बाजी मारली होती. आता येथील समीकरणे बदलताना दिसत आहेत. राकेश सिंह अजूनही 23 हजार मतांनी आघाडीवर आहेत.
BJP MP Plan : राजस्थानमधील दिग्‍गज नेत्‍यांना उतरवले निवडणूक रिंगणात
राजस्थानमधील झोटवाडा विधानसभा मतदारसंघातून भाजपने राजवर्धन सिंह राठोड यांना उमेदवारी दिली.राठौर हे जयपूर ग्रामीण लोकसभा मतदारसंघाचे खासदार आणि केंद्रीय माहिती आणि प्रसारण राज्यमंत्री देखील आहेत. राजवर्धन 32 हजारांहून अधिक मतांनी आघाडीवर आहेत.
दिया कुमारी राजसमंद मतदारसंघाचे खासदार आहेत. पक्षाने त्यांना विद्याधर नगर मतदारसंघातून उमेदवारी दिली. दिया या जयपूरचे महाराजा सवाई सिंह आणि महाराणी पद्मिनी देवी यांची कन्या आहेत. 10 सप्टेंबर 2013 रोजी आपला राजकीय प्रवास सुरू करून दियाने भाजपमध्ये प्रवेश केला. आतापर्यंतच्या मतमोजणीत दिया यांनी निर्णायक 66 हजार मतांनी आघाडी घेतली आहे.
विधानसभा निवडणुकीत भाजपने बाबा बालकनाथ यांना तिजारा विधानसभा मतदारसंघातून उमेदवारी दिली होती. ते सध्या अलवर लोकसभा मतदारसंघाचे खासदार आणि बाबा मस्तनाथ विद्यापीठाचे कुलपती आहेत. ते नाथ संप्रदायाचे आठवे प्रमुख महंत आहेत.
राज्यसभेच्या खासदार मीना यांना भाजपने सवाई माधोपूर मतदारसंघातून तिकीट दिले होते. मीना या शेतकरी प्रतिमेच्या नेत्या आहेत, त्यांची पूर्व राजस्थानमध्ये मजबूत पकड आहे. त्याचाच परिणाम म्हणजे त्यांना राज्यात ‘बाबा’ म्हणूनही ओळखले जाते. किरोरीलाल मीना भाजपच्या तिकिटावर निवडणूक लढवून अनेकवेळा आमदार आणि खासदार झाले आहेत. ते भाजपपासून वेगळे झाले आणि पीए संगमा यांच्या राष्ट्रीय जनता पक्षात (आरजेपी) सामील झाले, परंतु त्यांना यश मिळाले नाही. ते एकदा दौसा येथून अपक्ष उमेदवार म्हणून निवडणूक लढवून खासदार झाले. ७१ वर्षीय खासदार मीना यांचा जन्म ३ नोव्हेंबर १९५१ रोजी दौसा येथे झाला. आतापर्यंतच्या ट्रेंडनुसार मीना 14 हजारांहून अधिक मतांनी आघाडीवर आहेत.
भाजपने किशनगड मतदारसंघातून खासदार चौधरी यांना उमेदवारी दिली. भगीरथ हे अजमेर लोकसभा मतदारसंघाचे खासदार आहेत. ते राजस्थान 2013 च्या विधानसभा निवडणुकीत किशनगड मतदारसंघातून आमदारही राहिले आहेत.सध्या ते २७ हजार मतांनी मागे पडून तिसऱ्या क्रमांकावर आहेत.
सांचोर विधानसभा मतदारसंघातून भाजपने पटेल यांना उमेदवारी दिली होती. ही जागा जालोर जिल्ह्यात येते. देवजी पटले जालोरे हे सिरोही लोकसभा मतदारसंघातून तिसऱ्यांदा खासदार आहेत. त्यांनी 2009, 2014 आणि 2019 मध्ये सलग लोकसभा निवडणूक जिंकली आहे. ४७ वर्षीय देवजी पटेल यांना देवजीभाई एम पटेल या नावानेही ओळखले जाते.
मांडवा मतदारसंघातून भाजपने नरेंद्र कुमार खिचड यांना विधानसभा निवडणुकीत उमेदवार केले होते. ही जागा राज्यातील झुंझुनू जिल्ह्यात येते. नरेंद्र सध्या झुंझुनू लोकसभा मतदारसंघातून खासदार आहेत. नरेंद्र त्यांच्या भागात ‘प्रधानजी’ म्हणून लोकप्रिय आहेत. नरेंद्र यांनी 2004 मध्ये भाजपमध्ये प्रवेश केला. 2008 मध्ये निवडणूक लढवली; पण पराभवाला सामोरे जावे लागले होते.
BJP MP Plan: छत्तीसगडमध्ये चार खासदारांचे भवितव्य पणाला
छत्तीसगडमधील सुरगुजा लोकसभा मतदारसंघातील खासदार आणि केंद्रीय राज्यमंत्री रेणुका सिंह यांना भाजपने प्रेम नगर मतदारसंघातून भाजपने निवडणूक रिंगणात उतरवले आहे. त्‍या 4757 मतांनी आघाडीवर आहेत.गोमती साई या रायगड लोकसभा मतदारसंघाच्या खासदार आहेत. भाजपने त्यांना पाथळगाव विधानसभा मतदारसंघातून उमेदवारी दिली होती. त्यांची स्पर्धा काँग्रेसच्या रामपुकरसिंह ठाकूर यांच्याशी होती. आतापर्यंत गोमती सात हजारांहून अधिक मतांनी आघाडीवर आहेत.
बिलासपूर लोकसभा मतदारसंघाचे खासदार अरुण साओ छत्तीसगडेचे प्रदेशाध्यक्षही आहेत. लोर्मीमधून अरुण साओ यांना उमेदवारी देण्यात आली होते. बिलासपूरचे खासदार असल्याने साओ यांचा अनेक जागांवर प्रभाव आहे, त्यामुळे त्यांना उमेदवारी देण्यात आली. सध्या ते 25 हजार मतांनी आघाडीवर आहेत.
विजय बघेल (पाटण): विजय बघेल 2019 मध्ये पहिल्यांदा लोकसभेवर निवडून आले. दुर्ग लोकसभा मतदारसंघातून ते विजयी झाले. याआधी त्यांनी तीनवेळा विधानसभा निवडणूकही लढवली होती. यावेळी पक्षाने त्यांना त्यांचे काका आणि राज्याचे मुख्यमंत्री भूपेश बघेल यांच्या विरोधात उभे केले होते. त्यांना कडवी झुंजही दिली.