Chandrayaan-3 MahaQuiz | ‘चांद्रयान-३’ मोहिमेवरील प्रश्नांची उत्तरे द्या अन् जिंका १ लाख रूपये, जाणून घ्या कसे सहभागी होणार?

Chandrayaan-3 MahaQuiz

पुढारी ऑनलाईन डेस्क : चांद्रयान-३ च्या यशस्वी मोहिमेमुळे भारताने अवकाश क्षेत्रात नवीन इतिहास रचला आहे. भारताच्या या उल्लेखनिय कामगिरीचा गौरव करण्यासाठी केंद्र सरकारकडून खास महाप्रश्नमंजुषा स्पर्धेचे आयोजन करण्यात आले आहे. यात यश मिळवणाऱ्या टॉप स्पर्धकांना १ लाख रूपयांचे बक्षीसं जिंकण्याची संधी मिळणार आहे. याची माहिती इस्रोने 'X' (पूर्वीचे ट्विटर) वरून दिली आहेत. (Chandrayaan-3 MahaQuiz)

इस्रोने दिलेल्या माहितीत म्हटले आहे की, 'चांद्रयान महाक्विज' स्पर्धेचे लाईव्ह आयोजन करण्यात आले आहे. या स्पर्धेत सर्व भारतीय नागरिकांना सहभागी होता येणार आहे. यासाठी https://isroquiz.mygov.in/ या लिंकवर क्लिक करून तुम्हाला देखील स्पर्धेत सहभागी होता येणार आहे. (Chandrayaan-3 MahaQuiz)

Chandrayaan-3 MahaQuiz:@mygovindia has organised Chandrayaan-3 MahaQuiz honouring India's amazing space exploration journey, to explore the wonders of the moon, and to demonstrate our love of science and discovery.
All Indian Citizens are invited to take the Quiz at… pic.twitter.com/yy7ULjTcGL
— ISRO (@isro) September 5, 2023

भारताच्या आश्चर्यकारक अंतराळ संशोधन प्रवासाचा गौरव करण्यासाठी, चंद्राच्या चमत्कारांचा शोध घेण्यासाठी आणि विज्ञान आणि शोधावरील आपले प्रेम प्रदर्शित करण्यासाठी या स्पर्धेचे आयोजन करण्यात आले आहे, असेही इस्रोने स्पष्ट केले आहे.

Chandrayaan-3 MahaQuiz: पंतप्रधान मोदींचे विद्यार्थ्यांना आवाहन

या महाप्रश्नमंजुषा स्पर्धेत सहभागी होण्याचे आवाहन पंतप्रधान नरेंद्र मोदी यांनी विद्यार्थ्यांना केले आहे. "मी विद्यार्थ्यांना चांद्रयान ३ महाक्विझमध्ये सहभागी होण्याची विनंती करतो. यामुळे त्यांना देशाच्या चंद्र मोहिमेची माहिती घेण्यास मदत होईल."

काय आहेत नियम आणि अटी?

ही प्रश्नमंजुषा सर्व भारतीयांसाठी खुली आहे.
योग्य OTP नमूद केल्यानंतर 'सबमिट' बटणावर क्लिक करताच प्रश्नमंजुषा सुरू होईल.
यात १० प्रश्नांची उत्तरे ३०० सेकंदात द्यावी लागणार आहेत. यात निगेटिव्ह मार्किंग असणार नाही.
सहभाग घेणाऱ्यांनी प्रोफाइल पेजवर सर्व वैध आणि योग्य तपशील नमूद केल्याची खात्री करणे आवश्यक आहे. अपडेटेड प्रोफाईलचा वापर सहभागींसोबत पुढील संवादासाठी केला जाईल. अपूर्ण प्रोफाइल असलेल्यांना विजेता म्हणून घोषित केले जाणार नाही.

सर्वोत्तम कामगिरी करणाऱ्या विजेत्यांना असे मिळणार बक्षीसं

'चांद्रयान महाक्विज' स्पर्धेतील सर्वोत्तम कामगिरी करणाऱ्या प्रथम विजेत्या स्पर्धकाला ₹ 1,00,000 (एक लाख रुपये). द्वितीय क्रमांकाच्या विजेत्याला ₹ 75,000 (पंचाहत्तर हजार रुपये) तर तृतीय क्रमांकाच्या विजेत्याला ₹ 50,000 (पन्नास हजार रुपये) बक्षीस देऊन सन्मान करण्यात येणार आहे. पुढील १०० सर्वोत्तम कामगिरी करणाऱ्यांना प्रत्येकी ₹ 2000 (दोन हजार) रूपयांचे बक्षीस असेल तर पुढील आणखी २०० जणांना प्रत्येकी ₹ 1000 (एक हजार रूपये) देण्यात येणार आहेत, असेही इस्रोकडून वेबसाईटला दिलेल्या माहितीत स्पष्ट केले आहे.