पुढारी ऑनलाईन डेस्क : सोशल मीडिया प्लॅटफॉर्मवर 'अश्लील भाषा' आणि 'वाईट शब्द' वापरण्याचे नियमन करण्यासाठी नियम आणि कायदे करण्यात येणार आहेत, अशी माहिती केंद्र सरकारने दिल्ली उच्च न्यायालयाला दिली आहे. ( vulgar language on social media platforms )
सोशल मीडियावरील एका शोमध्ये अश्लील आणि असभ्य भाषेच्या वापरावरुन मार्च २०२३ मध्ये दिल्ली उच्च न्यायालयाचे न्यायमूर्ती शर्मा यांनी ताशेरे ओढले होते. अशा वेब-सिरीजमधील अश्लीलता तरुणांची मने भ्रष्ट करेल. सोशल मीडिया आणि OTT प्लॅटफॉर्मवरील सामग्रीचे नियमन करण्यासाठी योग्य कायदा, मार्गदर्शक तत्त्वे आणि नियम लागू करण्याच्या इतर अनेक देशांप्रमाणेच आपल्या देशासमोरील आव्हानाकडे तातडीने लक्ष देण्याची गरज आहे, असेही निरीक्षण न्यायमूर्ती शर्मा यांनी नोंदवले होते तसेच या प्रकरणी अभिनेते आणि निर्मात्यांविरुद्धचा गुन्हा रद्द करण्यास नकार दिला होता. मध्यस्थ मार्गदर्शक तत्त्वे आणि डिजिटल मीडिया नीतिशास्त्र कोड नियम, 2021 च्या कठोर अंमलबजावणीसाठी पावले उचलण्याचे निर्देश दिले होते. ( vulgar language on social media platforms )
माहिती आणि तंत्रज्ञान मंत्रालयाने दिल्ली उच्च न्यायालयात एक अहवाल दाखल केला आहे. यामध्ये नमूद केले आहे की, वेब-सीरिज कॉलेज रोमान्सशी संबंधित प्रकरणात न्यायालयाच्या निरीक्षणाची केंद्र सरकारने दखल घेतली आहे.सोशल मीडियाचे नियमन करणे हा एक धोरणात्मक निर्णय आहे. योग्य नियम लागू केले जातील. सोशल मीडिया प्लॅटफॉर्मचे नियमन करण्यासाठी नियम करेल. न्यायालयाच्या या निकालाद्वारे व्यक्त केलेल्या चिंता भविष्यातील नियम आणि नियमांमध्ये समाविष्ट केल्या जातील, असेही स्पष्ट केले आहे.
