Seema Haider : सीमा हैदर एटीएसच्या ताब्यात, चौकशी दरम्यान पाकिस्तानी सैन्याचे कनेक्शन आले समोर
पुढारी ऑनलाईन डेस्क : सध्या पाकिस्तानी महिला सीमा हैदर आणि सचिनची लव्हस्टोरी देशात चर्चेचा विषय बनला आहे. दरम्यान, सीमा हैदरवरही पाकिस्तानी गुप्तहेर असल्याचा आरोप होत आहे. त्याचवेळी यूपी एटीएसच्या टीमने पाकिस्ताची रहिवासी सीमा हैदरला ताब्यात घेतले असून एटीएसने सीमा हैदरची अज्ञात ठिकाणी चौकशी सुरू केली आहे. सीमा हैदर सुरुवातीपासून एटीएसच्या रडारवर होती, ती तिचा प्रियकर सचिनला भेटण्यासाठी नेपाळमार्गे भारतात आली होती. आता व्हॉट्सअॅप चॅट आणि सर्व पुराव्याच्या आधारे एटीएसचे पथक अधिक चौकशी करणार आहे. (Seema Haider)
सीमाची ओळखपत्रे उच्चायुक्तांना पाठवण्यात आली असून तिचे काका पाकिस्तानी लष्करात सुभेदार आहेत. सीमाचा भाऊ पाकिस्तानी सैनिक असल्याची माहिती मिळाली आहे. भारताची सुरक्षा एजन्सी आता सीमेवर चौकशी करणार आहे. प्रेमकथेपासून ते भारतात येण्यापर्यंतच्या सर्व बाबींवर चौकशी सुरू आहे. उत्तर प्रदेशातील एका वरिष्ठ पोलिस अधिकाऱ्याने सांगितले की, सीमा ही पाकिस्तानी नागरिक आहे. तिच्या येण्यामध्ये अनेक समस्या आहेत. अशा परिस्थितीत त्याची चौकशी करणे आवश्यक असल्याने देशाच्या सुरक्षेशी निगडित अशा सर्व यंत्रणा त्याची चौकशी करतील. (Seema Haider)
२०१९ मध्ये PUBG खेळताना सीमा आणि सचिन मीना एकमेकांच्या संपर्कात आले. त्यानंतर त्यांची प्रेमकहाणी सुरू झाली. यानंतर, १३ मे २०२३ रोजी सीमा हैदर नेपाळमार्गे बसने भारतात आली. उत्तर प्रदेश पोलिसांनी दिलेल्या माहितीनुसार, सीमा आणि सचिन ग्रेटर नोएडाच्या रबुपुरा भागात राहतात, जिथे सचिन किराणा दुकान चालवतो. त्याचवेळी व्हिसाशिवाय नेपाळमार्गे तिच्या चार मुलांसह बेकायदेशीरपणे भारतात प्रवेश केल्याप्रकरणी पोलिसांनी सीमाला ४ जुलै रोजी अटक केली. यासोबतच एका अवैध निर्वासिताला आश्रय दिल्याच्या आरोपावरून सचिनची तुरुंगात रवानगी करण्यात आली होती. या दोघांची नंतर सुटका झाली असली तरी आता पुन्हा उत्तर प्रदेश एटीएसने सीमाला चौकशीसाठी ताब्यात घेतले आहे. (Seema Haider)
