Jaipur robbery viral video : जयपूरमध्ये एका व्यावसायिकासाठी २० रुपयांची कचोरी अत्यंत महागडी ठरली. दुचाकीवरून २० लाखांची रोकड घेऊन जाताना त्यांना कचोरी खाण्याचा मोह झाला. यासाठी ते थांबले. कचोरी खात असतानाच दुचाकीवरून आलेल्या दोन चोरट्यांनी त्यांच्याकडील २० लाख रुपयांची रोख रक्कम असलेली बॅग पळवून नेली. नाहरगड पोलीस ठाण्याच्या हद्दीत घडलेली ही घटना सीसीटीव्ही कॅमेऱ्यात कैद झाली आहे.
या घटनेचा व्हिडिओ सोशल मीडियावर व्हायरल झाला आहे. व्हिडिओमध्ये व्यावसायिक चंपलाल आरामात आपल्या स्कूटरवर बसून कचोरी खाताना दिसत आहेत. ते कचोरी खाण्यात मग्न असतानाच, दुसऱ्या स्कूटरवरून दोन व्यक्ती त्यांच्या जवळ येतात. मागच्या सीटवर बसलेली व्यक्ती चटकन रोख रकमेची बॅग हिसकावून घेते आणि दोघेही तिथून पळून जातात.
चंपलाल कचोरी खात होते. त्यांच्या हातात अजूनही कचोरी होती, तेवढ्यात चोरट्यांनी डाव साधला. स्कूटरच्या समोर ठेवलेली रोकड असणारी बॅग हिसकावून घेत दोघे चोरटे दुचाकीवरून पसार झाले. चंपलाल यांनी संशयितांचा धावत पाठलाग केला. स्थानिक लोकही मदतीसाठी पुढे आले, परंतु ते दोन चोर पळून जाण्यात यशस्वी झाले.
नाहरगड पोलीस ठाण्याच्या हद्दीत घडलेली ही घटना सीसीटीव्ही कॅमेऱ्यात कैद झाली आहे. पोलीस परिसरातील सीसीटीव्ही फुटेज तपासत आहेत. हेल्मेट घातलेल्या चोरट्यांची ओळख पटवण्याचा प्रयत्न सुरू आहे.
चंपलाल यांच्या तक्रारीवरून गुन्हा दाखल झाला असून, तब्बल २० लाखांची रोकड जवळ असताना २० रुपयांची कचोरी खाण्याचा मोह किती महागात पडला, याची चर्चा व्हायरल व्हिडिओमुळे सुरू आहे.
