यवतमाळ : जिल्ह्यातील मुकुटबन वनपरिक्षेत्रातील भेंडाळा नियतक्षेत्र कक्ष क्र. २० वी सावळी रोपवनामध्ये वाघीणीला अर्धांगवायु झाला होता. हा प्रकार समोर येताच अंधारी व्याघ्र प्रकल्पातील जलद बचाव पथक पाचारण करण्यात आले होते. वाघीणीवर उपचार करुन पुढील उपचारासाठी नागपुर येथील गोरेवाडा वन्यप्राणी बचाव केंद्रात पाठविण्यात आले होते. मात्र, त्या ठिकाणी उपचारादरम्यान वाघीणीचा मृत्यू झाला.
मुकुटबन वनपरिक्षेत्रातील भेंडाळा नियतक्षेत्र कक्ष क्र. २० वी सावळी रोपवनामध्ये अर्धांगवायु झालेली वाघीण आढळून आली होती. वाघीणीला रेस्क्यु करून उपचार करण्यासाठी ताडोबा अंधारी व्याघ्र प्रकल्पातील जलद बचाव पथकास घटनास्थळी पाचारण करण्यात आले. चमुचे प्रमुख पशुवैद्यकीय अधिकारी डॉ. रविकांत खोब्रागडे यांनी वाघीणीला बेशुध्द करण्यासाठी डार्ट तयार केला. अजय मराठे (निशानेबाज) यांनी वाघीणीच्या डाव्या खांद्यावर अचूक निशाना साधून डार्ट मारला बाघीण बेशुध्द झाल्यानंतर वाघीणीची तपासणी करण्यात आली. वाघीणीला अर्धांगवायू झाला असल्याचा पशुवैद्यकीय अधिकाऱ्यांनी अंदाज वर्तविला होता. त्यानंतर तिला पुढील उपचारासाठी नागपूर येथील गोरेवाडा वन्यप्राणी बचाव केंद्रांत स्थलांतरीत करण्यात आले. उपचारादरम्यान या वाघीणीचा मृत्यू झाला. या घटनेला धनंजय बायभासे उपवनसंरक्षक यांनी दुजोरा दिला.
